Kapildihan ni Pacman

Dako ang ngisi sa mga Pinoy human nidaog si Manny “Pacman” Pacquiao sa iyang sangka batok sa Puerto Rican nga si Miguel Cotto. Ang kadaogan sa kampeyon nga boksingero nga Pinoy, kalampusan ‘sab sa tanang Pinoy sa tibuok kalibutan. Di’ malalis, si Pacman na ang hari sa ring tungod sa pito ka mga titulo nga iyang gihuptan karon. Wa’ pay laing boksingero nga naghupot sa maong titulo. Tungod niini, di’ lang mga mahiligon sa sport nga boksing ang gipabilib ni Pacman apan si bisan kinsa nga nasayod sa kinabuhi ug kalampusan sa people’s champ. Apan di’ ikalimod nga luyo sa kalampusan ni Pacman, nagpahipi ang mga kapildihan sa giisip nga bag-ong bayani sa nasud.

Sama sa gipanlantaw, mingaw ang kadalanan ug wa’y halos krimen nga natala sa tibuok nasud adlaw nga Domingo atol sa sangka ni Pacman. Ang maong sitwasyon, mahitabo lang sa matag sangka sa labing gisaludohan nga boksingero karon sa kalibutan. Apan luyo sa gibarugan ni Pacman nga kadaugan mao ang kapakyas balik dire sa nasud. Sa sunod-sunod nga kadaugan ni Pacman, hangtud karon, pakyas gihapon ang tinguha ni Pacquiao nga mahiusa ang mga Pinoy sa mas malungtaron nga paagi. Sa makadaghang higayon gisulti ni Pacman nga kun pwede palang, adlaw-adlawon niya ang sangka kun nagpasabot ni og kahiusahan alang sa mga Pinoy.

Pakyas si Manny sa pagpukaw natong tanan nga ang panaghiusa ug pakigkumbati paingon sa mas malungtaron nga kalambuan sa nasud, di’ lang mahitabo sa matag sangka niya. Pakyas si Pacman sa pagpahinumdum kanatong tanan nga wa’ ta magkinahanglan og sangka niya o kadaugan sa matag away niya aron mahibawo ‘ta unsa ka lig-on ug determinado ang mga Pinoy aron makab-ot ang mas malinawon ug hapsay nga pagpadagan sa atong nasud. Pakyas si Pacman sa pagpahibawo nato nga wa’ na magkinahanglan pang motulo ang iyang dugo ug mabun-og ang iyang lawas aron lang mahinumdum ‘ta unsa ka isog ang kaliwat ni Lapu-lapu ug unsa ka determinado ang bansagon ni Bonifacio.

Gitakdang mobalik sa nasud si Pacman su’d ning semanaha aron atubangon ang labing bag-ong sangka sa iyang kinabuhi. Ang pagdagan pagka-kongresista sa lalawigan sa Saranggani ang hatagan og igong panahon sa kampeyon. Giisip sa uban nga pagbuling-buling sa iyang panga’n ang pagsu’d unya ni Pacquiao sa politika. Alang sa uban nagtuo nga nisunod lang sa sulsol sa publiko ug mga politiko si Pacman. Apan alang sa pound-for-pound king, buot lang niya nga tubagon ang hagit nga mangulo sa ilang dapit ug buot niyang ipadayon ang pagserbisyo sa katawhan pinaagi sa pagsu’d sa politika. Tungod ba kaha sa pagka-dismaya ni Pacman sa mga nahitabo sa nasud karon luyo sa iyang mga kadaugan, hinungdan nga natumod siya sa pagsakay sa labing hugaw, labing bakakon ug labing gubot nga sangka sa nasud?

Basin nawad-an na pud sa paglaom si Pacman sama sa minilyon ka mga Pinoy. Kun nadaog niya ang labing dagkong mga away sa boxing ring, karon buot pang lumpagon sa kampeyon ang labing dakong hagit sa kinabuhi sa matag Pinoy. Kun nilampos siya sa iyang mga sangka ug napildi sa labing una niyang pagdagan sa politika, ang mga taga Saranggani ray mag-igo kung mohaom ba niya ang bag-ong titulo isip kongresista sa maong lalawigan. Luyo sa mga damgo ni Manny sa nasud, makapahugno paminawon nga bisan ang sangka nga di’ na unta niya angayan pang suklan, kinahanglan pa niyang himuon. Nagtuo ang kampeyon nga iyang kadaugan sa boxing ring ug ang disiplina, katakos ug determinasyon nga iyang gipakita atubangan sa minilyon ka mga tawo nga nagtan-aw kaniya, manakod sa usa sa labing hugaw ug ngil-ad nga sangka sa nasud ang politika.

Sama sa mga nangagi nga sangka, gituyo ‘sab nako nga wa’ motan-aw sa sangka ni Pacquiao niadtong Domingo. Di’ ko buot mahibawo sa resulta nga ‘live’ gikan sa telebisyon. Sama sa mga nangagi nga sangka, buot nakong mahibaw-an ang resulta gikan sa ubang mga tawo nga mopahibawo nako. Pinaagi niini, di’ nako makuyawan gyud. Apan wa’ sa kadaugan ni Pacman ang kadaugan natong mga Pinoy. Apan ana-a sa matang sa pagduwa, kalidad sa disiplina, katakos sa mga barugan ang mga kumo ug labaw sa tanan, hatagan og katumanan ang mga damgo sa mga Pinoy. Di’ na maihap ang daghang garbo nga gihatud sa mga Pinoy sa atong nasud. Apan dugay pa sigurong mahitabo nga ang nasud na mismo ang maghatag og garbo sa matag Pinoy pinaagi sa maayong pagpadagan sa gobiyerno.

* * *

Email: [email protected] or [email protected]