Lindol sa Mindanao

YANIG kung yanig ang inabot ng Mindanao matapos tumama ang malakas na 7.8 magnitude na lindol noong Hunyo 8 na nag-iwan ng matinding pinsala sa Sarangani, General Santos City, at mga karatig-lugar.

Sa loob lang ng ilang segundo, maraming buhay ang nabaligtad.

Aabot sa higit 60 katao ang nasawi habang daan-daan naman ang nasugatan. Libu-libong pamilya ang napilitang lumikas matapos masira ang kanilang mga bahay o mangambang gumuho pa ang mga natitirang istruktura dahil sa mga kasunod na pagyanig.

Hindi rin nakaligtas ang mga paaralan, kalsada, at iba pang pasilidad. Mahigit 3.2 milyong estudyante ang naapektuhan habang maraming residente ang nawalan ng tirahan at kabuhayan.

Maraming mangingisda ang nawalan ng bangka. May mga magsasakang nasira ang mga pananim. Ang ilang maliliit na negosyante naman ay nawalan ng pinagkukunan ng kita.

Sa mga liblib na lugar, lalo na sa mga komunidad ng Blaan, Lumad, at Moro, marami pa rin ang naghihintay ng sapat na tulong gaya ng pagkain, malinis na tubig, at gamot.

Patuloy ang kilos ng mga lokal na pamahalaan at mga ahensiya ng gobyerno upang maihatid ang tulong sa mga apektadong lugar. Gayunman, marami pang pamilya ang nangangailangan ng agarang suporta habang unti-unti silang bumabangon mula sa pinsalang iniwan ng lindol.

Sa kabila ng hirap na kanilang dinaranas, kapansin-pansin pa rin ang bayanihan sa mga komunidad. Mara­ming residente, volunteer, at iba’t ibang grupo ang nagtutulungan upang makatulong sa mga naapektuhang pamilya.

Samantala, pinapayuhan ng mga awtoridad ang publiko na manatiling alerto sa mga posibleng aftershock at sundin ang mga panuntunan sa kaligtasan habang nagpapatuloy ang rehabilitasyon sa mga apektadong lugar.