Lin tiwalang makakapasok si Kai Sotto sa NBA

MANILA, Philippines — Naniniwala si dating NBA star Jeremy Lin na darating ang tamang panahon para makapasok sa NBA si Gilas Pilipinas standout Kai Sotto.

Alam ni Lin ang pinagdaraanan ni Sotto dahil ganito rin ang naging daan na tinahak nito bago makapasok sa NBA.

Nagpartisipa si Lin sa NBA Draft noong 2010 pero hindi ito nakuha.

Subalit nakapasok ito sa NBA nang hugutin ito ng Golden State Warriors sa parehong taon.

Naglaro rin ito para sa New York Knicks noong 2011 hanggang 2012 gayundin sa iba pang NBA teams gaya ng Houston Roockets, Los Angeles Lakers, Charlotte Hornets, Brooklyn Nets, Atlanta Hawks at Toronto Raptors.

Sumabak din sa draft si Sotto noong 2022 subalit hindi ito nakuha ng sinumang team.

Para kay Lin, hindi ito ang katapusan ng NBA dream ng 7-foot-3 Pinoy cager dahil marami pang pagkakataon na maari itong makapaglaro sa NBA lalo pa’t bata pa ito.

Kasalukuyang nagpapagaling si Sotto sa kanyang ACL injury.