Pagpamusil, upat patay

CEBU, Philippines — Upat ka mga insidente sa pagpamusil ang natala sa kapolisan, ang duha niini nahitabo sa Cebu City niadtong Biyernes sa gabii, Marso  21 ug kagahapon adlaw nga Sabado, Marso 22,2025.

Kagahapon adlaw nga Sabado,  gipusil patay ang usa ka 36-anyos nga lalake sa wala pa mailhing tawo diha sa Sitio Mayupay, Barangay Quiot, siyudad sa Sugbo alas- 4 sa hapon.

Ang biktima mao si Mark Anthony Bagtong, 36 anyos, dunay kaipon ug taga Sitio Lower Suran, Barangay Quiot ning siyudad.

Matud pa mao pay pag-abot sa biktima sa dapit ug dihang naka-park na kini sa iyang motorsiklo niabot sab ang wala mailhing tawo ug gipusil kini.

Gidala pa sa tambalanan ang biktima apan nakabsan kini sa kinabuhi. Giingong bag-o pang nakagawas sa prisohan ang biktima apan wala ibutyag kun unsa iyang kaso.

Samtang pasado alas 12 sa tungang gabii kagahapon gipusil patay ang usa ka Danilo Albia Tenebroso,27, diha sa B. Rodriguez Street, Sitio Riverside, Barangay Sambag 2, Siyudad sa Sugbo.

Sa pagresponde sa mga sakop sa Abellana Police Station 2 Cebu City Police Office , nagbuy-od na sa dalan ug nagkadugo ang ulo sa biktima.

Sa inisyal nga imbestigasyon, nagkuyog ang biktima ug kaipon niini nga nanuwa og computer sa internet shop.

Nigawas ang biktima kay nipalit og sigarilyo apan sigon sa mga estambay sa lugar, usa ka wala mailhing tawo ang ninaog sa gisakyang scooter nga motor ug giduol ang biktima ug diretsong gipusil sa likod nga bahin sa ulo gamit ang wala pa matino nga kalibre sa armas.

Daling nisibat ang mamumuno luwan sa iyang motor. Na-recover sa SOCO Team sa crime scene ang tulo ka basiyo sa bala ug ug usa ka deformed slug.   Duha ka samad pinusilan sa ulo ang nakit-an sa biktima.

Paglabay sa kapin duha ka oras, gitubag kini og laing pagpamusil sa Sitio Bajac, Barangay Poblacion, Lungsod sa Liloan.

Ang biktima mao si Jomar Mantuhac Andrini, 31, dunay kaipon ug nagpuyo sa Purol Cogon, Barangay San Vicente, Lungsod sa Liloan.

Kuyog ang mga higala nga nagpaabot og masakyan gikan sila namalit og burger sa dihang giduol kini og wala mailhing tawo ug gipusil ang ulo sa biktima  nga maoy hinungdan sa kamatayon niini.

Human mahimo ang krimen dali nga nisibat ang mga lalaki padung sa Sitio Sambag, San Vicente.

Niadtong Biyernes sa gabii, duna say gipusil patay sa Sitio Riverside, Barangay Singsing, Lungsod sa Balamban.

Ang biktima mao si Warren Gonzales Paul, 53, nagpuyo sa Lamac, Lungsod sa Consolacion.

Gipusil kini sa duha ka mga wala pa mailhing tawo nga nagsul-ob og itom nga jacket ug sakay sa itom nga scooter nga motorsiklo.

Girespondehan kini sa kapulisan ug pag-abot nila sa lugar naabtan nila ang biktima nga wala nay panimuot nga nagbuy-od sa kasagbutan nga bahin sa taytayan ug nagkadugo.

Gidala dayon kini sa Balamban Provincial Hospital sa mga sakop sa Emergency Medical Services apan gideklarar kining dead-on-arrival.

Sa inisyal nga imbestigasyon sa kapulisan ang biktima uban ang kaipon niini nagbarog sa taytayan sa dihang ang nangabot ang mga mamumuno ug diretsong gipaulanan og bala ang biktima gamit ang wala pa matino nga kalibre sa armas.

Ang biktima natagak sa taytayan , samtang daling nisibat ang mga mamumuno padung sa direksyon sa Hingatmonan.

 Ang kapolisan padayun pa sa ilang imbestigasyon pagtino sa mga motibo ug pag-ila sa mga mamumuno sa maong upat ka pagpamusil. (BANAT NEWS)