Komitiba umolon aron modumala sa groundwater extractions sa Metro Cebu

CEBU, Philippines — Giplanohan ang pag umol og usa ka technical working committee aron sa pagdumala sa groundwater extractions sa Metro Cebu.  Kini ang gipadayag ni Minority Floor Leader, Konsehal Nestor Archival Sr. human sa executive session pagtuki sa saltwater intrusion sa groundwater sa dakbayan sa Sugbo taliwala sa El Nino phenomenon.

Gitug-an ni Archival nga ang mga pribadong kontraktor walay mga regulasyon sa pag kuha sa groundwater.

Muingon ang kuhaon 10,000 lang, pero ang kuhaon 20,000, mao nay dako kaayo nga problema diba,  matod niya.

Kini bisan pa sa gipagawas nga memorandum nga did-an na ang pagtugot niini apan tungod sa mga permit nga gi-isyu, nagpadayon kini.

Matud ni Archival nga way gahom ang Metro Cebu Water District (MCWD) sa pag-isyu og permit kundili ang National Water Resources Board (NWRB) lang.

Atol sa executive session, si MCWD representative Limeul Canastra pangulo sa environment and water resources department niingon nga ang groundwater potential sa Metro Cebu nga gilangkuban sa upat ka lungsod anaa sa 250,000 cubic meters matag adlaw.

Anaa sa 170,000 cubic meters ang kasamtangang gikuha nga groundwater sa MCWD. Labing menos 130,000 cubic meters matag adlaw gikan sa MCWD lang.

Kini gikan sa di mominos 100 ka mga deep-wells gikan sa Cebu City paingon sa Talisay City.

Sa matag ting-ulan sumala pa ni Canastra, ang kasagaran nga produksiyon gikan sa surface water ug groundwater anaa sa 280,000 cubic meters kada adlaw. Matud niya, adunay mga wala ma-supplyan sa MCWD nga adunay gibanabanang panginahanglan nga 500,000 cubic meters sa tibuok lugar. 

Kini nagpasabot nga kini mao kadtong adunay kaugalingong tinubdan sa tubig ug kadaghanan niini nga mga tinubdan gikan sa groundwater.

Si Canastra niingon nga tungod ila kining gikonsiderar nga kritikal nga sitwasyon aduna silay tripartite agreement uban sa National Water Resources Board sa mga dakbayan sa Lapulapu, Mandaue ug Cebu City.

 Nga together for us three to complement in safeguarding the resources especially the groundwork resources,  matud pa niya. (BANAT NEWS)