Mga tinubdan sa tubig sa Cebu City padayong nihubas

CEBU, Philippines — Nagpadayon ang paghubas sa tinubdan sa tubig sa Dakbayan sa Sugbo tungod sa grabeng kainit sa panahon.

Nabantayan nga adunay parte diha sa Buhisan dam nga nangliki na ang yuta tungod sa pagkahubas sa tubig ug adunay mga isda nga nakitang nangamatay.

Ang Buhisan dam usa sa gisaligan nga surface water supply sa Dakbayan sa Sugbo diin kanhi puno sa tubig apan karon naughan na.

Ug tungod sa ka mabaw ug kainit sa tubig inanay nga nangamatay ang mga isda sa dam ug maklaro na ang lapok sa ilawom.

Makita usab ang kakahoyan nga anaa sa palibot nga nagsilbing batuganan sa mga langgam ilabi na sa mga banog ang inanay usab nga nalaya ang dahon.

Base sa datos sa Metropolitan Cebu Water District nikabat na sa 54 mil cubic meters ang paghubas sa tubig kada adlaw sa mga surface water sources nila.

si Minerva Gerodias, tigpamaba sa MCWD nagkanayon nga gawas sa Buhisan dam nikunhod usab og dako ang Jaclupan dam sa Dakbayan sa Talisay gikan sa 30 mil cubic meters nga naandan kada adlaw nahimo nalang kining 10 mil cubic meters karon.

Ug gumikan niini masinati gyud usahay ang pagkabalda sa supply sa tubig sama sa paghinay sa pressure ug pagkawala sa tubig sa mga dapit nga sakop sa franchise area sa water utility hinungdan nga nipahigayon na sila og water delivery service.

Dako pa ang latason sa krisis nga nasinati karon ug gilaoman sa MCWD nga magamit na sa kataposan niining buwana o sa unang bahin sa mayo ang tubig nga gipaubos sa desalination process sa ilang partner stakeholder.