Rama, laing pito ka opisyales gipaubso unom ka buwan nga suspension

CEBU, Philippines — Si Mayor Michael Rama sa Dakbayan sa Sugbo ug laing pito ka opisyales ubos sa iyang buhatan ang gipahamtangan og unom ka buwan nga preventive suspension sa Ombudsman tungod sa reklamo sa upat ka empleyado s city hall kinsa giingong wala makadawat og sweldo sulod sa napulo ka buwan.

Nagsagol ang emosyon nga gibati sa maong mga kawani human nipabor kanila ang anti-graft office sa ilang gisang-at nga kaso batok sa opisyales sa city hall.

Ang mga nireklamo mao sila si Sybil Ann Ybañez, Maria Almicar Diongzon, Chito Dela Cerna ug Filomina Atuel kinsa sa samang higayon naguol usab nga naapil si Rama sa mga gipahamtangan og silot. Si Rama maoy signatory sa nahitabo kanila sa ilang trabaho.

Ang Ombudsman niluwat og preventive suspension sulod sa unom ka buwan batok kang Rama ug laing pito ka opisyales nga ubos sa buhatan sa mayor.

Ang maong mga kawani nipasaka og kasong grave misconduct unbecoming of a public officer, conduct prejudicial to the best interest of the service, grave abuse of authority ug violation of code of conduct and ethical standards for public officials and employees.

Ang maong mga reklamante giingong dugay nang nag-alagad diha sa assessor’s office apan nahibulong sila nga kalit lang silang gilabay sa laing tahas hinungdan nga nidangop sila sa civil service commission ug nakakuha sila og resolution nga nagbalik kanila sa ilang naandan nga pwesto.

Apan matud sa maong mga kawani nga wala gihapon sila ilha sa pangulo sa assessor’s office ug wala sweldohi sulod sa napulo ka buwan.

Nipalabang usab og resolution ang konseho sa siyudad aron masweldohan ang maong mga kawani kinsa gidestino na sa city admin office diin gihatagan sila og sweldo apan sulod lang sa upat ka buwan.

Ang maong mga kawani niduso sa ilang reklamo ngadto s Ombudsman niadtong Pebrero niining tuiga.

Si Rama kinsa atoa sa kaulohan nibutyag nga wala pa siya nakadawat og kopya sa giingong suspension order gikan sa office of the ombudsman.

Ug matud ni Rama nga wala usab siya nakadawat og kopya sa reklamo sa nahisgutang mga kawani.

Si Rama nagkanayon nga wala usab siya hatagi og higayon nga makadepensa sa iyahang kaugalingon sa maong mga reklamo.  (BANAT NEWS)