Bukirang barangay sa Talisay gibisita sa mga polis

CEBU, Philippines — Gisuroy sa kapolisan sa Siyudad sa Talisay ang mga bukirang barangay ug gipakigtagboan ang mga negosyante.

Si Police Lieutenant Colonel Epraem Paguyod, hepe sa kapolisan sa siyudad maoy nangulo sa pagbisita ngadto sa mga negosyante.

Tumong niini nga makita ang sitwasyon sa lugar ug maimplementar nila ang mga programa pagpakgang sa krimen.

Ang mga barangay nga gibisita sa grupo ni Paguyod mao ang Manipis, Camp 4 ug Jaclupan.

Gipaminaw ni Paguyod ang ang suliran sa pagpatunhay sa kahapsay ug kalinaw nga gipadayag ngadto kaniya sa opisyales sa nahisgutang mga barangay.

Nasuta ni Paguyod ang panginahanglan sa pagbutang og Police Community Precinct sa Jaclupan ilabi na nga layo ang barangay sa ilang opisina.

Ang presensiya sa kapolisan maoy tinguha sa opisyales sa barangay aron adunay kaabag ang ilang mga barangay tanod matag adunay alarma nga mahitabo.

Sa laing bahin, si Paguyod nakigtagbo sa opisyales sa mga negosyante sa Dakbayan sa Talisay ug gihisgotan nila ang pagpalambo sa seguridad sa patigayon. (BANAT NEWS)