Mga pagkaon sa atleta sa Talisay gitakos na kini

CEBU, Philippines — Gatinaksanay na sa pagkaon alang sa mga delegado sa Dakbayan sa Talisay nga nisalmot sa Central Visayas Regional Athletic Association (CVIRAA).

Kini maoy gusto ni Mayor Gerald Anthony “Samsam” Gullas, Jr. imbes nga isulod og styro foam ang pagkaon.

Sayo pa, nangreklamo ang mga atleta sa siyudad sa gihatag nga pagkaon kanila tungod kay giingong pan-os kini.

Matud ni Gullas nga wala na siya makaagwanta sa reklamo hinungdan nga nanginlabot na siya niini.

Giingong ang supplier sa napas-on nga pagkaon nirason nga styro foam ang gisudlan sa mga pagkaon ug dugay nakaon maong nadaot kini.

“Dili ko modawat ana nga rason. Ugg dili kaya dili unta nila dawaton ang order. Kong ako lang wagtangon na ni sila nga mo supply sa pagkaon”, padayag ni Gullas.

Nasayran nga ang supplier nipasalig kang Gullas nga anaa na sila’y tawo nga niadto sa billeting area sa mga delegado sa Dakbayan sa Talisay aron maoy motakos sa pagkaon ug masiguro nga dili mapan-os ang pagkaon nga gi-serve.

Ang Dakbayan sa Talisay nigahin og pundo nga nikabat ngadto sa P9 milyones alang sa mga kagamitan, uniporme, pagkaon ug bisan unsa nga magamit kalabot sa pagsalmot sa CVIRAA.

Si Gullas nibisita kini sa mga kabataan sa billeting area ug gipasabot sa gihimo sa gobiyerno sa pagtubag sa reklamo.

Usa ka atleta nga dili magpahingan nipahibawo nga ang gihatag nga suhistiyon sa mayor mao gyud ang nahitabo diin ang supplier na gyud ang motakos sa sud-an ug kan-on.

Iyang gipahibawo nga longganisa ug itlog ang ilang sud-an kagahapon sa buntag nga bag-o gyud nga luto. (BANAT NEWS)