Forklift sa barko nasunog

CEBU, Philippines — Usa ka forklift ang nasunog sa sulod mismo sa usa ka barko nga nakagaid sa Berth #12, sa Cebu Baseport, Cebu City sumala pa sa Cebu Ports Authority kagahapon sa alas 8 pasado sa buntag

Sumala pa sa pamahayag sa CPA nga gi- post sa ilang Facebook page dunay forklift sa sulod sa MV Trans Asia 21 nga kalit lang nisilaob hinungdan sa pagresponde sa kabomberohan gikan sa Bureau of Fire Protection uban sa nagkalainlaing kabomberohan sa siyudad.

Base sa post sa Bureau of Fire Protection -7  gibanabanang moabot sa P5 milyones ang danyos sa maong sunog.  Hinuon sumala pa sa report sa Port Police Office napawong ra sad dayun kini 10:38 sa buntag. Maayo nalang nga walay naangol o nakalas sa maong insidente.

Sumala pa sa CPA, gipaabot pa sa Trans Asia Shipping Lines  ang resulta sa inspeksyon sa Philippine Coast Guard (PCG)  ug MARINA sa ilang barko.

Kini aron masiguro nga luwas ug pwede kining makabiyahe.— IBM BANAT NEWS