Polis patay human nibangga ang motorsiklo sa truck

CEBU, Philippines — Patay ang usa ka polis human nibangga ang gimaneho niiining motorsiklo ngadto sa trailer truck nga nagparada daplin sa karsada diha sa Sitio Gahad, Barangay Poblacion, Lungsod sa Sibonga niadtong Martes sa gabii.

Ang nakalas mao si Patrolman John Anthony Quintao, hingkod ang panuigon lumad nga taga Lungsod sa Siaton, Probinsiya sa Negros Oriental samtang ang drayber sa trailer truck mao si Tereso Sumbaquil Dela Rosa, 44-anyos, nagpuyo sa Barangay Lamac, Lungsod sa Sibonga.

Nasayran nga si Quintao nadestino sa Regional Mobile Force Battalion (RMFB)-7.

Base sa imbestigasyon sa Sibonga Municipal Police Station ang nga trailer truck nagparada diha sa kilid sa karsada, pawong ang makina sa truck apan gasiga ang hazard lights niini.

Nahibaw-an sa kapolisan nga walay gibutang nga early warning device ang drayber sa truck sa direksiyon paingon sa Lungsod sa Argao.

Si Quintao nagbiyahe kini gikan sa amihanan paingon sa habagatan ug nibangga kini sa walang bahin sa likod sa truck.

Dali nga gidala sa Carcar District Hospital ang biktima apan gideklarar kining patay na nga naabot sa tambalanan gumikan sa grabeng kadaot sa lawas niini sa ka kusog sa impact sa pagkabangga.

Natanggong karon sa detention cell Sibonga Municipal Police Station si Dela Rosa ug gikatakdang pasakaan og kasong reckless imprudence resulting in homicide ug damage to property.

Ang RMFB-7 nipaabot sa ilang mga pahasubo sa pagtaliwan sa ilang police personnel.

"His bravery, courage, and countless contributions will be honored in our hearts forever", tipik sa post sa RMBF-7 diha sa ilang Facebook page.

Sa laing bahin, duha ka disgrasya sa Dakbayan sa Talisay ang nakuha sa footage sa command center diha sa Cebu South Coastal Road (CSCR).

Bisan og dili grabe ang danyos sa disgrasya, ang pangulo sa City of Talisay-Traffic Operation Development and Aunthority Jonathan “Joy” Tumulak nagkanayon nga mas maayo gyud nga hapsay ra ang pagbiyahe.

Subling nipahimangno si Tumulak ngadto sa mga motorista nga mosubay sa lagda sa trapiko ug magmabinantayon sa kauban nga sakyanan o motorista. (BANAT NEWS)