Ordinansa pagdili sa paggamit  og plastic gipasabot sa MCENRO

CEBU, Philippines — Ang mga sakop sa Mandaue City Environment and Natural Resources (MCENRO) sa siyudad sa Mandaue nakigtigum sa mga representante sa mga supermarket ug malls sa siyudad.

Kini aron tukion ang gipatuman nga ordinansa kabahin sa pagdili sa paggamit og plastic nga putos sa mga baligya.

Lakip sa ilang gihimo ang orientation ug pagpasabot kabahin sa kadaut nga mamugna sa paggamit og plastic ngadto sa kinaiyahan.

Nasuta sa mga pagtuon nga ang pagpataka og paglabay sa plastic o selopin nakahatag kini og dakong problema sa kalikopan ug nakabara sa mga kanal o drainage.

Ang mga plastic dako og kadaot sa kinaiyahan tungod kay dili kini madunot o malata ug adto kini motugpa sa mga kanal nga maoy hinungdan sa pagbara sa dagayday sa tubig nga moresulta sa pag-awas ug pagbaha.

Nitambong sa tigum mao ang mga representante sa Parkmall, Pacific Mall, Insular Square, ug Gaisano Mall ingon man mga nagdumala og tindahan sa kabarangayan sa dakbayan sa Mandaue. (BANAT NEWS)