Ika-57th nga Malasakit Center sa nasud gilusad diha sa CCMC

CEBU, Philippines —  Gilusad kagahapon ang ika-57th nga Malasakit Center sa nasud ug nahimutang kini diha sa Cebu City Medical Center.

Atol sa inagurasyon niini nitambong si Senador Bong Go kauban ang opisyales sa Dakbayan sa Sugbo nga gipangulohan ni Mayor Michael Rama.

Si Go ang nag-umol sa maong pasilidad isip usa ka one-stop-shop alang sa government medical and financial assistance sa mga kabus nga pasyente.

Ubos sa Malasakit Center anaa ang Department of Social Welfare and Development (DSWD), Philippine Health Insurance Corporation (PhilHealth), Philippine Charity Sweepstakes Office (PCSO) ug Department of Health (DOH).

Nagkanayon si Rama nga dako kaayo og tabang ang maong pasilidad ngadto sa mga kabus nga pasyente.

Sa iyang bahin, si Go nagkanayon nga dili siya ang  angayan nga  pasalamatan sa maong proyekto diin instrument lang siya ug angayang hatagan og pagtimbaya mao ang katawhan nga maoy nagbutang kaniya sa serbisyo.

Gipasalamatan usab niya ang tanang frontliners nga maoy nag-una sa pakigkombate sa pandemiya.

Nagkanayon si Go nga sa Rehiyon-7 kapin na sa 700,000 ka pasyente ang natabangan sa maong klase nga programa.

“Full support gyud ko basta maghisgot og healthcare system”, padayag ni Go.

Nikabat ngadto sa P20 milyones ang gi-download nga assistance kagahapon alang sa maong Malasakit Center diha sa CCMC.

Sa laing bahin, Gidala sa Talisay City Health Office ang mobile clinic ngadto sa mga tunghaan.

Kini aron ilang masiguro nga mapaubos sa eksaminasyon ang mga kabataan sa ilang panglawas lakip na ang ilang mga ngipon. Si Dr. Lino Alanzado, pangulo sa City Health Office nibutyag nga rekisitos sa daycare centers nga masusi ang panglawas sa kabataan ilabi na sa nag-edad og tulo katuig ngadto sa 6-anyos.

Nipahimutang sila sa mobile clinic diha sa barangay hall sa Linao diin naa usab ang daycare center. Matud ni Alanzado nga karon nga nag usab-usab ang panahon mas maayo nga masuta ang panglawas sa mga kabataan.

Nanghatag usab sila og vitamins ug mga tambal sa mga bata.

Sugod sa buwan sa Enero niining tuiga nakasuroy na ang mobile clinic og 10 ka  daycare centers. (BANAT NEWS)