Polis nanumbag, nanion og kaubang polis
CEBU, Philippines — Hayan masuspenso sa serbisyo ang usa ka 29-anyos na lalakeng pulis nga nadestino sa usa support unit sa PNP dinhi sa rehiyon human kini gidakop kay matud iyang gisumbag ug gitionan og armas ang iyang kaubang polis diha sa ilahang opisina pasado alas-10 sa miaging gabii nga nahimutang sa Uytengsu Street, Barangay Sambag 1, Siyudad sa Sugbo.
Ang suspek nagranggo og Patrolman, lumad nga taga IloIlo City apan kasamtangan nga nagpuyo sa Barangay Sambag 1 sanglit dinhi man kini nadestino.
Samtang ang biktima nga polis sab nagranggo gihapon og Patrolman, 25, lumad nga taga Bacolod City apan nagpuyo karon sa Barangay Sambag 2 ning siyudad.
Matud ni Police Major Mark Don Alfred Leanza, hepe sa Abellana Police Station 2 sa Cebu City Police Office ang biktima nigawas sa gipuy-an kay mag withdraw ogkwarta.
Paggawas sa biktima nakit-an niya iyang classmate nga gainom duol ra sab sa ilang boarding ug gihagad siya niini. Matud pa agi og maayong pamatasan nirespetar siya og inom duha ka baso ug nananghid nga moadto kini sa ATM kay mag withdraw.
Apan matud pa samtang galakaw ang biktima giingong gisundan kini sa suspek ug pag-abot sa may Uytengsu Street gisumbag siya niini sa ulo ug gitionan matod pa sa service firearm ug gibaharan.
"Gibaharan nga sige pagsumbong nalang...papelan nalang daw siya, in policeman term murag sige pakasohan mo nalang ako ganyan," sigon ni Major Leanza.
Human sa hitabo ang biktimang polis nidiretso sa police station ug ni report sa hitabo. Dali dayon kining girespondehan sa kapulisan sa Station 2 uban ang SWAT-CMFC ug gidakop ang suspect.
Na-recover gikan sa suspek ang usa ka PNP issued caliber . 9mm ug magazine nga dunay 17 ka bala. Kasong physical injuries ug grave threats ug administrative case ang ipasaka batok sa suspek. (BANAT NEWS)
- Latest
