24 ka panimay gilamoy sa kayo sa Talisay

CEBU, Philippines — Miabot sa 24 ka panimay ang gilamoy sa sunog diha sa Sitio Tugas ug Deca Homes Phase 1 sa Barangay Dumlog, Dakbayan sa Talisay niadtong Miyerkules sa hapon.

Nadawat sa kabumberohan ang alarma alas 5:47 sa hapon diin giisa sa first alarm alas 5:47 sa hapon. Gikaingon nga nagsugod ang kayo sa panimay ni Tita Jimenez. Alas 5:58 sa hapon giisa sa second alarm ang sunog ug niabot gyud kini sa third alarm mga alas 6:09 sa gabie.

Si kanhi konsehal Peter Earl Hermosisima Alegre nagkanayon nga walay nadunggan nga buto ang iyang anak, diretsu na kalayo ang iyang nakita sa panimay sa iyang iyaan.

Matud pa niya nga wala gyud silay nasalbar nga butang kay naglumba na sa pagpalayo ang iyang pamilya. Nakontrolar ang sunog mga alas 6:36 sa gabie ug na fireout kini alas 6:47 sa gabie.

Matud pa sa mga residente nga kalit kaayo ang maong mga panghitabo diin ang uban nanglayat na sa koral sa mga kasikbit nga mga Subdivision aron maluwas human na trap sila tungod kay wala nay lain nga agianan sa sunog nga niulbo.

Pipila ka mga residente giingong adunay nagduslit og motor nga adunay kabilinggan sa hunahuna nga tawo butang nga sutaonon pa sa kabomberohan.

Apan si Claudio Jimenez, usa sa mga residente nga biktima sa sunog og giingong didto nagsugod sa ilang paninalay ang nibutyag nga dako ang iyang pagtuo nga kuryente gikan sa poste ang hinungdan sa pag-ulbo sa kayo.

Sumala pa ni Claudio, sa dihang palakaw na siya sa ilang balay padulong sa baybayon sa dumlog alang sa iyang panginabuhian nakakita na siya og spark sa linya sa kuryente sa poste apan wala niya igsapayan ug wala magtuo nga mao na hinoon kini hinungdan sa maong sunog. Apan siya miinsister nga kun nagsugod sa ilang balay ang sunog, dili unta masalbar ang iyang asawa kinsa naka wheelchair na.

Hinuon ang tanang impormasyon mahitungod sa hinungdan sa sunog ipaubos pa sa imbestigasyon sa kabomberohan.

Sa pakisusi sa kabumberohan sa Talisay, unom ang partially damaged samtang 18 ang totally damaged sa sunog.  Sa inisyal nga ihap, 16 ka pamilya o 74 ka indibidwal ang apektado sa sunog. Gibana-bana nga niabot sa P1,200,000 ang danyos niini.

Si Mayor Gerald Anthony  Samsam  Gullas mipakatap sa iyang mga sakop sa pag asistar sa mga apektadong pamilya nga gipapasilong karon sa basketball gym. Tulo ka adlaw ang ihatag nga libre nga pagkaon hangtud nga makahatag sila og pinansyal nga ayuda. Padayon pa ang imbestigasyon  may labot sa hinungdan sa sunog. (BANAT NEWS)