Lolo gidunggab sa kainom

CEBU, Philippines — Patay ang usa ka 72-anyos nga lolo human gidunggab sa iyang silingan pasado alas 9 sa gabie sa adlaw ng Miyerkules sa Sitio Dulong-Dulong, Barangay Dagatan, Lungsod sa Badian.

Ang biktima mao si Andres Cagang Palagtiosa, residente sa Sitio Dulong-Dulong, Barangay Dagatan samtang ang suspek mao ang silingan niini nga si Darwin Hitutua.

Sa imbestigasyon sa Badian Municipal Police Station, ang biktima ug ang suspek nag-abot sa balay sa pag-umangkon sa namatay kay matud pa death anniversary niini.

Giingong nagkalalis ang duha samtang nag-inom ug aron maulang ang suspek uban sa iyahang amigo gihatod ang biktima. Apan pag-abot matud pa sa balay sa biktima giingong gituok sa biktima ang suspek ug gisumbag.

Kini maoy rason nga nasuko ang suspek, niuli sa ilang balay ug nikuha og kutsilyo ug maoy gigamit pagdunggab sa tiyan sa biktima.

Kagahapon sa alas- 8 sa buntag boluntaryong mitahan sa iyang kaugalingon ang suspetsado nga gihatod sa iyang kaparyentihan. (BANAT NEWS)