P2.7 milyones shabu nasakmit sa SACLEO sa LCPO
CEBU, Philippines — Nasakmit sa kapolisan sa Lapu-Lapu City Police Office (LCPO) ang P2.7 milyon nga shabu gikan sa 40 ka mga pusher nga ilang nadakpan atol sa Simultaneous Anti -Criminality Law Enforcement Operation SACLEO.
Suma ni Police Colonel Ali Baron, Officer-In-Charge sa LCPO nga ang SACLEO ilang gihimo niadtong Abril 19 hangtud sa Abril 21, 2024 ug ilang nasikop ang 46 ka pusher sa managlahing buy bust operation nga gihimo sa mga sakop sa City Intelligence Unit (CIU) City Drug Enforcement Unit (CDEU) ingon man sa lima ka presinto sa LCPO.
Ang mga pusher nga nadakpan pulos lang mga Street Level Individual (SLI). Sa maong operasyon nasakmit ang 399.75 gramo nga shabu nga nagkantidad og P2,718,300.00.
Dugang pa ni Baron nga lakip sa ilang nadakpan ang duha ka Most Wanted Person ug 18 ka mga Ordinary Wanted Person.
Nadakpan usab ang 11 ka tawo nga nag tong-its ingon man naghantak ug nasakmit ang P1,680.00.
Samtang sa laing operasyon, tanggong sa prisuhan ang usa ka 30-anyos nga konduktor sa jeep human kini nadakpan sa buy-bust operation sa Special Operation Unit-7 PNP Drug Enforcement Group sa Barangay Subangdaku, siyudad sa Mandaue kagahapon sa hapon.
Ang suspetsado mao si Virgilio Desamparado A os alyas Bady, konduktor sa jeep, high value individual ug residente sa Avocado Street, Barangay Mambaling, siyudad sa Sugbo.
Nakuhaan ang dinakpan og 100 gramos sa gituohang shabu nga nagkantidad og P680,000.
Nasayran nga duha ka semana nga gipaubos sa monitoring ang suspetsado ug giingong gikan sa jail facility ang tinubdan niya sa illegal nga drugas ug suguon lang kini sa paghatud sa shabu. Decemay P. Padilla, Romeo D. Marantal (BANAT NEWS)
- Latest
