Karsada paingon sa tukoran  sa bag-ong Capitol bldg hapit na mahuman

CEBU, Philippines — Anaa na sa 88 porsyento ang nahuman sa access road sa Barangay Cambuhawe ang dalan padulong sa usa sa mga site nga giplanohan sa Probinsya sa Sugbo nga tukoran sa Provincial Government Center sa lungsod sa Balamban.

Kini ang gipahibalo sa assistant regional director sa Department of Public Works and Highways (DPWH) Danilo Villa Jr ngadto kang gobernadora Gwendolyn Garcia atol sa ilang tigum niadtong Abril 23.

Sumala sa Capitol Information Office, ang DPWH niduso sa P193 million nga road access project gikan sa Brgy. Pondol padulong sa Virgin Mary Shrine, ug sa road opening gikan sa maong dapit padulong sa posibleng project site sa Capitol kon asa itukod ang eksaktong replica sa iconic Cebu Capitol Building sa dalan Escario sa dakbayan sa Sugbo.

Gitataw usab ni Engr. Mary Ann Bueno ang hepe sa Environmental Impact Assessment section sa Environmental Management Bureau nga ang area kon asa gitukod ang access road ug posibleng lokasyon sa bag-ong Capitol Building dili ubos sa protected area.  Pagasabton nga gikonsiderar kini nga dapit nga alienable and disposable alang sa development o pagpalambo.

Atol sa tigum, ang gobernador nisubli sa plano sa Kapitolyo pagpalit sa mga luna sa maong dapit alang sa pagtukod og imprastraktura subay sa tinguha niini nga ibalhin ang seat of provincial government ngadto sa Balamban. (BANAT NEWS)