Nangalisbong polog landfill, buot pasirad-an sa mga molupyo

CEBU, Philippines — Ang mga lumulupyo sa Barangay Polog sa Consolacion, Cebu subling nanawagan sa gobiyerno nga ipasira ang pribadong landfill sa ilang barangay tungod sa pagpangalisbo sa baho sa basura.

Ang maong landfill gipanag-iya sa Asian Energy System Corporation modawat og mga basura gikan mga pribadong garbage haulers ingon man sa mga LGUs.

Sa usa ka exclusive interview sa DYHP-Cebu kang Barangay Polog Kagawad Lurimarc Alin, ang naulahi niingon nasagmuyo na gyud ang iyang mga kabarangay tungod sa nangalisbo nga baho ug mga nagpasad nga basura gikan sa operasyon sa maong landfill.

“Nakita kasi namin na ‘yung mga trak ng basura ay walang takip at saka over po yung paglagay ng mga basura sa landfill,” matud ni Alin.

Apan ang mga barangay officials mipasabot nga wala silay gahom nga pasirad-an ang maong landfill aron maaksyonan ang yangongo sa ilang mga konstituwente.

“Maraming beses na po yan na narinig ko, pati sa social media. Kasi for us, barangay officials, we cannot demolish them kasi binili na nila yang lupa, private kasi yan,” matud ni Alin sa maong interbyu.

Miangkon siya nga lisud kun sila lang mga barangay officials ang molihok pagsulbad niini tungod kay pribado kini nga landfill ug sila mismo limitado nga maka-access sa sud aron sa pag-inspeksyon.

Busa nanawagan sila kauban ang mga molupyo nga pahugtan sa gobiyerno pinaagi na EMB sa DENR sa paghimo og aksyon sama sa paghimo og inspeksyon  una pa hatagan og permit sanglit silang mga anaa sa barangay maoy pirmeng basulon.

Hinuon, gibutyag ni Alin nga napaabot na nila ngadto sa munisipyo ug usab sa Environmental Management Bureau (EMB) sa Department of Environment and Natural Resources (DENR) ang ilang problema.

Buot sab nila nga nga mag-site inspection ang EMB nga dili magpahibalo aron makita gyud ang tinuoray nga sitwasyon sa lugar.

Tabunan dayon

Samtang sa landfill usab sa Barangay Tapul sa Dakbayan sa Talisay, girekomendar sa City Disaster Risk Reduction and Management Office (CDRRMO) nga sa matag labay sa basura sundan dayun kini og tabon og anapog, aron dili mosilaob tungod sa kainit sa panahon sama sa nahitabo sa nakalabay nga mga adlaw.

Si Alvin Santillana, pangu sa CDRRMO sa siyudad miingon nga ilang girekomendar ngadto nagdumala sa landfill nga matag labay og basura abunohan sab dayon kini og anapog.

Duha ka semana na ang rubbish fire sa maong landfill nga nakapahasol sa mga residente tungod sa aso.

Una niini, si Fire Chief Insp. Alvin Torion, fire marshal miingon nga pirmeng naay naka-estambay nga fire truck duol sa maong landfill tungod aning kalit-kalit nga pag-ulbo sa kalayo.

Apan bisan gani aning pag-abuno og anapog, gibuhat kini sa hinay-hinay lang nga paagi tungod sa nagtipun-og nga basura nga peligro sab sa nagmaneho sa backhoe. — /IBM (BANAT NEWS)