Mandaue mopatuman og rerouting karong adlawa

CEBU, Philippines — Gipahibalo ni Hylle Retuya, pangulo sa Traffic Enforcement Agency of Mandaue (TEAM) ang mga motorista kalabot sa rerouting nga ipatuman sa dalan nga nagtadlas sa Barangay Maguikay sa Siyudad sa Mandaue nga molungtad kini og duha ka semana diin adunay road closure nga himuon sugod karong adlawa, Marso 24, 2025.

Kini tungod sa giugmad nga drainage project diha sa maong dapit.

Gipasabot ni Retuya nga ang maong proyektio makaepekto sa dagan sa trapiko sa mga dalan nga naglakip sa V. Albaño St., L. Jayme St. hangtud ngadto sa eskina nga bahin sa ML Quezon Avenue sa Barangay Maguikay.

Matud ni Retuya nga gipatuman sa lokal nga kagamhanan ang pagpalambo sa drainage sustem sa moang mga dalan sa paghatag og tukmang kasulbaran sa nasinati nga mga pagbaha diha sa maong lugar.

Si Retuya nagkanayon nga ang drainage rehabilitation sa siyudad kabahin kini sa long-term flood mitigation efforts sa lokal nga kagamhanan.

Nunot niini, sa paglikay sa paghuot sa kahimtang sa mga sakyanan sa maong lugar ilang giawhag ang mga drayber sa pagsubay sa mga alternative routes nga ilang nakita nga makapakunhod sa masinati nga paghuot sa dagan sa trapiko.

Ang motorista nga mopadulong sa Siyudad sa Sugbo gikan sa M.C. Briones St., adto mosubay sa dalan L. Jayme St., moliko sa wala sa V. Albaño St., ug adto na mogawas sa Sacris Road ug molahos ngadto sa A. S. Fortuna Street.

Sa mga sakyanan gikan sa SM J Mall, adto mosubay sa V. Albaño St. ug moliko sa wala paingon ngadto sa L. Jayme Street dayon subay sa Sacris Road moliko kini sa tuo paingon sa L. Jayme St. ug M.C. Briones Street.

Matud usab ni Retuya nga ang maong mga dalan ilang gibutangan og mga barrier ug traffic sign sa paghatag og giya sa mga drayber. — /BDB (BANAT NEWS)