Pito ka tulisan nadakpan

CEBU, Philippines — Pito ka mga notadong tulisan ang nadakpan sa duha ka managlahing operasyon sa kapulisan sa Mabolo Police Station 4 Cebu City Police Office (CCPO) ug Criminal Investigation and Detection Group(CIDG) -7 nidtong Miyerkules sa kaadlawon, Pebrero 2,2025.

Kining tulo ka mga giingong tulisan nadakpan diha sa Gorordo Avene, Siyudad sa Sugbo giila nga silang alyas Ivan, 29; alyas Prince, 27; ug si alyas Jiovanie, 28, pulos molupyo sa maong dapit.

Usa ka 26-anyos nga babayeng nagpuyo sa Barangay Apas ang gitulis sa grupo matud pa ni Police Major Romeo Caacoy Jr., hepe sa Mabolo Police Station.

Matud pa misuway og sulod ang grupo sa mga kwarto sa usa ka apartment sa diha sa Barangay Apas apan sirado ang mga kwarto.

Ang biktima nigawas aron unta mokaon  nasugatan niya ang mga suspetsado ug siya maoy gitulis ug gikuha ang iyang cellphone nga nagkantidad og P30,000.

Sa follow up operation sa kapolisan, nadakpan ang mga suspek ug nabawi ang cellphone sa biktima ug nasakmitan sila og kalibre .22 nga armas.

Sa laing operasyon, nadakpan sa mga sakop sa Criminal Investigation and Detection Group(CIDG) -7 ang upat ka mga giingong notadong tulisan atol sa buy-bust operation sa Sitio Angay-angay, Barangay Toong, siyudad sa Sugbo, Miyerkules sa gabii, Pebrero 12, 2025.

Ang mga nadakpan mao ang managsuong Jamie, 22, ug Jake Paraiso, 21,  ug ilang mga kaubang sila si Edcel Caballero, 39, taga Sitio Lower, Barangay Toong ug si James Sabal, 25, taga Sitio Taytayan, Barangay Buhisan.

Nagkanayon si Police Captain Joel Deiparine, pangulo sa CIDG Regional Special Operating Team nga nahitabo ang operasyon human dunay nisumbong kanila nga gibaligyaan og armas sa grupo.

 Miyerkules sa gabii gilusad dayon ang buy-bust operation batok kang Jamie nga maoy nagbaligya og armas hinungdan sa pagkasikop niini ug duha ka kauban samtang nakaikyas unta si Sabal apan nadakpan kini sa follow-up operation diha sa ilang balay.

Nasuta sab nga ang motor nga na-recover kang James gi-carnap nila ug maoy ilang gigamit sa pagtulis sa usa ka lalaki sa Barangay Tisa sa miaging semana. Ang maong tulis nakuha sa CCTV nga gi-post sa barangay            kapitan.

 Pagsusi sa CIDG sa Labangon Police Station 10 Cebu City Police Office nasuta nga daghan na og mga reklamo batok sa grupo sama sa lungkab ug tulis.

Si Edcel nangangkon nga kawad-an ang rason maong nisulod siya sa pagpamaligya og armas. Si Jamie miingon nga P15,000 ang presyo sa kada kalibre .45 nga armas nga ilang baligya. 

Giawhag sa kapulisan ang mga nabiktima sa mga suspetsado nga mopatim-aw sa ilang opisina aron madugangan ang kasong ipasaka batok nila.

Kasong kalapasan sa Republic Act 10591 ug Comelec gun ban ang ipasaka batok sa mga suspetsado. (BANAT NEWS)