Nagtubag sa module gipusil

CEBU, Philippines — Patay ang usa ka 14 anyos nga batang babaye nga gipusil samtang kini nagtubag sa iyang modules diha sa ilahang balay sa V.H Garces Street sa Sitio Riverside Barangay Cansojong, Dakbayan sa Talisay kagahapon sa buntag.

Ang biktima usa ka grade 7 nga tinun-an, naigo dapit sa iyang aping. Si Police Lt. Col. Epream Paguyod, hepe sa kapolisan nibutyag nga nahitabo ang krimen mga alas 7 sa buntag pero na-report kini sa ilang buhatan mga alas 9 na sa buntag.

Matud pa ni Paguyod nga nagtubag sa iyang modules ang biktima ibabaw sa ilang lantay sa sud sa ilang balay sa dihang gisulod sa wa mailhing mamumuno nga nagtaptap sa nawong ug dayon gipusil kini sa nawong.

Nisibat ang mamumuno samtang gidala sa tambalanan ang biktima pero gideklarar kini nga dead on arrival.

Gisubay sab nila ang hinungdan kun nganong dugay nitawag og polis ang mga tawo.  Ang inahan sa biktima naglibog kung nganong adunay tawo nga mipusil sa iyang anak.

Atol sa hitabo, katupad sa biktima ang 12-anyos nga pagumangkon nga sama niya nagtubag sab sa ilang mga modules.

Ang pamilya sa biktima nibutyag nga adunay nanuktok sa ilang panimalay apan wala kini nila giablihan, apan dunay lalaking kalit lang nga nisulod ug gipusil ang ilang anak.

Pipila ka mga silingan sa biktima ang nakadungog og usa ka buto apan wala sila nakakita sa mamumuno, nga gituohang daling nakalusot-lusot sa mga sudlonon nga dalan. Ang inahan sa biktima walay nahibaw-an nga adunay kontra ang iyang anak.

Ang kapulisan sa Dakbayan sa Talisay nga gipangulohan ni Police Lt. Col. Epream Paguyod, ang padayon pa karon nga nihimo sa ilang imbestigasyon.

Lakip sa gisubay sa kapulisan ang background ug kung adunay cctv camera ang maong dapit.

Samtang ang Department of Education Central Visayas Director Salustiano Jimenez, nipadangat sa iyang pahasubo sa pamilya sa tinun-an.

Gikondinar niya kining brutal nga pagpatay sa maong tinun-an ug niawhag sa mga otoridad sa dinalian nga pagkasikop sa responsable sa nagbuhat niini.

Ang DepEd nagplano karon sa pagpadangat sa ilang suporta ngadto sa nagbangutan nga pamilya.  IBM BANAT NEWS