Bag-ong hepe sa kapolisan sa Talisay nilingkod na sa katungdanan

CEBU, Philippines — Hingpit nang nilingkod kagahapon sa katungdanan ang bag-ong hepe sa kapolisan sa Dakbayan sa Talisay nga si Police Lieutenant Colonel Epraem Paguyod kinsa maoy nihulip kang Police Lieutenant Colonel Wayne Magbanua kinsa nadestino na karon sa Plans and Programs sa Cebu Provincial Police Office.

Niadtong Martes gipahigayon ang turn-over of command diha sa CPPO headquarter.

Si Paguyod nagkanayon nga ang pagbansay sa mga beat ug foot patroller sa mga basic training sa usa ka sakop sa SWAT Team ang usa sa iyang gitinguha nga mapatuman.

Kini aron sa pagpalambo sa ilang kapasidad diha sa pagbantay ug pag-ila sa mga adunay dautang tinguha.

Matud ni Paguyod nga ipadayon usab niya ang mga maayong programa ug mga proyekto sa mga kanhi hepe sa Dakbayan sa Talisay lakip ang paghugop pagbalik sa mga force multipliers tungod kay dako usab kini og tabang pagmentinar sa kahapsay ug kalinaw sa siyudad.

Si Paguyod niawhag sa mga Talisaynon nga dili magpanuko sa pagduol sa kapolisan sa higayon nga aduna sila y mga problema ug ikatabang aron magpabilin ang kahapsay ug kalinaw sa komunidad.

Gimando ni Paguyod sa iyang mga sakop atol sa iyang gipatawag nga tigom nga mahimo silang epektibo diin kay walay rason nga dili sila epektibo sa paghimo sa ilang trabaho tungod kay hugot ang suporta nga gihatag sa lokal nga kagamhanan sa kapolisan gawas sa suporta gikan sa PNP.

Gusto ni Paguyod nga masinati sa mga Talisaynon ang tinuoray nga serbisyo sa kapolisan ngadto sa katawhan ug dili for compliance lang.

Mapasalamaton si Paguyod ngadto kang Mayor Gerald Anthony  Samsam  Gullas, Jr. sa kahigayonan nga gihatag sa kaniyaha nga mangulo sa kapolisan ug moserbisyo sa mga Talisaynon.

Karong buntag mohimo ang bag-ong hepe sa Dakbayan sa Talisay og courtesy call ngadto sa buhatan ni Gullas.

Si Paguyod kasagaran kining nadestino ngadto sa Mindanao ug nahimo usab nga pangulo sa SWAT sa National Capital Region Police Office. (BANAT NEWS)