Mayor Cortes mibisita sa mga senior citizens sa kabarangayan

CEBU, Philippines — Nagpadayon si Mandaue City Mayor Jonas Cortes sa pagbisita sa mga senior citizens sa kabarangayan ilabi na kadtong naglisod na sa paglakaw tungod sa kakulian sa ilang panglawas.

Kini ang unang higayon nga gihimo ni Mayor Cortes aron mahimamat ang katigulangan sa kabarangayan ug personal usab niyang gitunol ang unang hugna sa cash assistance nga P4,000.00.

Lakip sa gibisita sa mayor ang mga senior citizen nga nagpuyo sa Barangay Paknaan ug Barangay Basak.

Samtang ang mga senior citizen sa nahisgutang barangay nga makalakaw pa ang giandaman og sakyanan aron dad-on ngadto sa Mandaue City Cultural and Sports Complex diin gihimo ang pag-apod-apod sa P4,000 nilang pinansiyal nga ayuda. Sa nasayran apil sa gihimo ang libreng serbisyo ngadto sa mga katigulangan sa dakbayan sa Mandaue sama sa libeng medical check-up ug uban pa. (BANAT NEWS)