Rehiyon 7 may 8 milyones kapin ka mga lubangon

CEBU, Philippines -  Mikabat  na  sa 8,246,436    ang  mga    lubangon    nga    gamiton  sa   Department of Environment and  Natural Resources (DENR)7   alang  sa  National  Greening  Program (NGP) niini.

Sumala  sa  Forest  Management Services (FMS)  nga  kutob  sa Mayo 17, 2013,  ang  imbentaryo  nila  sa  mga  igtatanom  nga  mga  lubangon  anaa  na  sa  63  porsento  sa  13 milyones   nga   seedling  nga  angay  nilang  iandam  niining  tuiga.

Sumala   ni Eduardo M. Inting, Regional  Technical Director for  Forest  Management  Services  atol  sa Kapihan  sa PIA  kagahapon  nga  ang  Cebu  adunay  2,228,159;  Bohol  2,220,177;  Negros  Oriental  3,622,100;  ug  ang  Siquijor  37,000  ka  mga  igtatanom.

Matud  pa  ni  Inting  nga  naglakip  kini  sa  mga nagkalainlaing  mga  matang sa kahoy  nga  angay  itanom  sa  mga  lugar  nga  gikinahanglang  tanoman  og  mga  kahoy. Kini  naglakip  sa gemilina, mahogany, cacao  ug  uban  pa, agad  sa dapit  nga  tamnanan  og  kahoy.

Matud  pa ni  Inting  nga  sa  lugar  nga  tamnan  og  kahoy,  kun unsay  anaa  sa maong  dapit,  mao  usab  ang angay  nga  itanom.

Kining  buwan  sa Hunyo  maoy  gitawag  nga  Environment  month  ug  usa sa  paagi  nga  masaulog  sa DENR  ang  kalihokan  niini  nagtakda  kini  og  mga  petsa  alang  sa  pagpananom  og  mga  kakahoyan,  matud  pa  ni  Inting.

Matud  pa  niya  nga ang   Central  Visayas  gigahinan  sa kagamhanan  og  P136.566 milyones  aron  palabungon  ang  kakahoyan     sa  24 mil  ektarya  kapin  nga  kayutaan  niini.

 Ang  NGP  gilusad  sa kagamhanan  sa nasud  niadtong  Pebrero 24, 2011,  diin  sa maong  higayon  nakapananom  ang  DENR  og  kakahoyan sa kapin  sa 5 mil  ka  ektarya,  sa  tuig 2012,  11 mil  kapin ka  ektarya  ug  sa 2013,  gipaabot  nga  30 mil  kapin  ka ektarya  ang  katanoman  niini  og  mga  kahoy. (BANAT NEWS)