Nadugtang patay'ng lawas sa ginang napalgan

CEBU, Philippines - Natubag na ang dul-an duha ka semanang kalit nga pagkahanaw sa usa ka 50-anyos nga ginang nga buwag na sa banang German human madiskubrehi ang patay’ng lawas niini sulod sa bodega sa iyang balay sa sitio Bantigi sa barangay Luyang, lungsod sa Carmen niadtong Lunes sa hapon.

Ang nadugta na si Marissa Butleg Ott, 50, dihang nakaplagan sa mga nabalaka ug nangitang mga paryente.

Si Ott lumad nga taga lungsod sa Catmon apan nakapalit og yuta ug nagtukod og balay sa maong lugar human maminyo og langyaw kinsa mibuwag usab kaniya.

Matud ni SPO2 Simplicio Gibo sa Carmen Police Station dihang nahinabi sa Banat News ang igsuong lalaki ni Ott nga si Melvin Butleg, maoy nakadiskubre niini dihang mibisita kini.

Nahibulong si Butleg nga wala motubag ang igsuon sa iyang pagsangpit maong iyaha na lang kining gisusi ug diha niya madiskubrehi ang patay’ng lawas sa igsuon nga nagbitay sulod sa bodega. Sa banabana sa kapulisan nga moduha na ka semanang patay si Ott nga may higot nga pisi sa liog ug ang pikas tumoy gihigot dapit sa atop. Gitug-an sa igsuon niini sa kapulisan gawas nga gibuwagan sa bana ang iyang igsuon duna sad kini cervical cancer nga gihambin. (Darrel A. Carumba/EIM) (BANAT)