795 ka okopante og luna misumitir na og loan sa PAG-IBIG

CEBU, Philippines — Dul-an 800 pa lang ka mga okupante sa nagkadaiyang luna sa Probinsya sa Sugbo ang misumiter sa ilang loan application ngadto sa PAG-IBIG.

Sumala sa Kapitolyo gikan sa 3, 417 ka mga homeowners nga nipadangat og interest nga mo apply sa housing loan sa PAG-IBIG aron hingpit na nila maangkon ang mga luna nga iya sa Kapitolyo nga gitukoran sa ilang panimalay, 795 ang misumiter na sa mga gikinahanglan nga dokumento alang sa evaluation sa Pag-IBIG.

Ang Kapitolyo maoy nanag-iya sa pipila ka parcels sa luna nga anaa sa nagkadaiyang dapit sa dakbayan sa Sugbo, apil na niini kadtong anaa sa 93-1 lots, OPPRA, ug anaa sa barangay Kalunasan, Apas, ug Gawad Kalinga site sa lungsod sa Minglanilla.

Atol sa tigom tali sa mga opisyal nga gipangulohan ni gobernador Gwendolyn Garcia ug sa mga opisyal sa Pag-IBIG Fund gipangulohan sa CEO Marilene Acosta ug Deputy CEO Atty. Robert John Cosico, nasabotan nga ipatuman ang “Kaliwaan System” aron mapaspasan ug masayon na ang proseso sa pagbayad sa mga okupante.

Ubos sa maong sistema, ang Kapitolyo maoy moandam sa Deed of Sale sa mga propedad niini, samtang ang Pag-IBIG maoy moproseso sa loan checks.

Sumala sa Sugbo News, ang new portal sa Probinsya sa Sugbo, ang pormal nga pag turn over sa mga cheke ug deeds of sale ubos sa Kaliwaan System mahitabo atol sa selebrasyon sa Fiesta Senyor sa bulan sa Enero 2025.

Ang Kapitolyo unang nagkanayon nga andam niini ibaligya ang mga luna ngadto sa mga okupante pinaagi sa PAG-IBIg diin ang ahensya maoy mobayad sa Probinsya sa Sugbo ug ang mga okupante adto mobayad sa PAG-IBIG base sa nasabotan nga presyo matag metro kwadrado sulod sa pipila ka tuig.

Kon hingpit na mabayran ang kinatibuk-ang kantidad sa luna, mapanag-iya na sa okupante ang luna ug dili na kini gukdon pa sa Probinsya. (BANAT NEWS)