Mga polis ipakatap atol sa New Year’s countdown

CEBU, Philippines — Niabot sa 300 ka polis ang ipakatap sa Cebu City Police Office alang sa new year's countdown nga himuon sa Cebu City government diha sa Plaza Independencia karong adlawa.

Matud ni Police Lieutenant Colonel Maria Theresa Macatangay, deputy city director for operations ug tigpamaba sa Cebu City Police Office nga dili lang kahapsay ug kalinawo ang bantayan sa kapolisan apan apil na ang pag-assist sa mga motorista aron dili kaayo sila mabalda sa pag-uli ug paggawas sa Siyudad sa Sugbo.

Nunot niini, si Macatangay nagkanayon nga sa mga nanglabay nga katuigan adunay samang kalihokan diin dagan ra sa trapiko ang nakitang problema hinuon manageable ra kini ug apil kini sa ilang gipangandam.

Si Macatangay nagkanayon nga aron malikayan ang disgrasya sa pagsugat sa bag-ong tuig ang kapolisan gawas sa pag-inspeksiyon sa mga tindahan og pabuto nipahigayon usab og rekorida sa mga hilit nga bahin sa mga barangay nga nagpahimangno nga responsable sa paggamit og mga pabuto ug siguradohon nga dili makadisgrasya sa kinabuhi ug kabtangan. (BANAT NEWS)