Inahan, duha ka bata nangapaig sa duha ka inasidente sa sunog

CEBU, Philippines — Patay ang inahan ug anak kinsa nangapaig human sa pagkasunog sa ilang panimalay diha sa Purok Nangka, Barangay Ilihan, Lungsod sa Tabogon kagahapon sa kadlawon.

Ang mga biktima mao sila si Mylene Lubanga, 33-anyos ug anak niini nga si Regil Kent Lubanga, 7-anyos nga batang lalaki.

Nasayran nga ang laing anak sa biktima nga nagpangedaron og 14-anyos ug ang higala niini nga nagpangedaron og 15-anyos ang nakalingkawas sa maong hitabo.

Ang mga nakalingkawas maoy nakabantay sa kayo ug gitabangan pa nila ug pawong ang kayo pinaagi sa pagyatak-yatak apan wala na nila madala hinungdan nga naningkamot sila nga makagawas.

Ang mga nakalingkawas nga mga menor tungod sa karatol ug kalisang nakalimot kini sa pagpukaw sa mga nakalas kinsa natulog niadtong higayona.

Base imbestigasyon ni Fire Officer 2 Ian Morales, chief investigator sa Tabogon Fire Department nga sayo pa nag-brown out sa maong dapit hinungdan naggamit kini og kandila diha sa sala.

Dako ang pagtuo sa kabomberohan nga nataligam-an human nakatulog na ang mga biktima.

Ang kayo giingong dali kaayo nga nikaylap diin ang panimalay sa nasunog ginama sa light materials.

Ang kabomberohan padayon pa sa pagpahigayon og imbestigasyon sa maong hitabo.

Sa laing bahin, napaig ang usa ka tuig nga batang babaye human kini naapil sa pagkasunog sa ilang panimalay sa Purok Perico, Barangay Taytayan, Dakbayan sa Bogo niadtong Domingo sa hapon.

Gikataho nga ang bata mao lang kini nahibilin sa ilang balay samtang natulog.

Base sa imbestigasyon sa Bogo City Police Station nga ang upat ka igsuon sa biktima nga pulos menor de edad  diin ang kinamuguwangan nag-edad og 9-anyos pulos nagduwa og computer sa internet shop.

Nakabantay ang usa sa mga silingan sa biktima nga niaso ang panimalay niini.

Gitabang dayon nila kini apan paspas nga nikatap ang kayo sa mga panimalay nga ginama sa mixed light materials.  Dihang naabot ang kapolisan sa Dakbayan sa Bogo ug kabomberohan apil ang City Disaster Risk Reduction and Management Office naugdaw na ang balay sa biktima. 

Nasayran nga ang amahan sa biktima nga si Ruel Ynero Vela Cruz, 37-anyos, delivery rider wala sa ilang panimalay dihang nahitabo ang sunog tungod kay ni-duty sa trabaho.

Samtang ang inahan sa biktima atoa sa kaulohan nanarbaho isip katabang. (BANAT NEWS)