Babaye nag-shopping nga wala mobayad sikop
CEBU, Philippines — Nabalhog sa prisohan ang usa ka 24-anyos nga babaye human kini giingong nanguha og panty, bra, sinina ug uban pang pampagawapa sulod sa usa ka mall sa Barangay Mabolo, Siyudad sa Sugbo sa niaging adlaw.
Nasikop si alyas “Lyn”, 24, usa ka service crew, nagpuyo sa Sitio Kauswagan, Barangay Basak Pardo niining siyudad.
Usa ka 35-anyos nga assistant sa supermarket sa mall ug taga Barangay Tabok, Dakbayan sa Mandaue ang nireklamo batok sa suspetsdo samtang ang nagdakop sa naulahi mao ang gwardiya nga duty niadtong higayona.
Ang giingong gikuha sa suspetsado gilangkuban sa panty nga nagkantidad og P2,097; bra nga nibalor og P2,097; lima ka blouse nga nikantidad og P993; usa ka nivea acne nga P369; leggins nga tag P800 diin sa kinatibuk-an niabot og P9,351 ang kantidad sa mga gamit nga gikuha sa suspetsado.
Giingong gisulod sa suspetsado ang nahisgutang gamit sa backpack ug wala kini mobayad sa cashier.
Matud ni Police Major Romeo Caacoy, Jr., hepe sa Mabolo Police Station sa Cebu City Police Office nga giingong ang mga gamit nga gikuha sa suspek gamiton niya ug ang uban ibaligya. (BANAT NEWS)
- Latest
