Kabomberohan niawhag sa paggamit og tarotot pagsugat sa bag-ong tuig

CEBU, Philippines — Gitinguha sa Cebu City Fire Station nga walay sunog nga mahitabo sa Siyudad sa Sugbo gumikan sa pabuto niining pagsugat sa bag-ong tuig.  Ug giawhag nila ang publiko nga mogamit og alternatibong pamaagi sa pagsaba-saba ug likayan ang pabuto nga naghatag og risgo dili lang sa kinabuhi sa tawo lakip na sa kabtangan.

Gihangop sa Cebu City Fire Station nga atol sa pagsaulog sa pasko walay sunog nga nahitabo sa Cebu City tungod sa pabuto.

Aron mamentinar kini si Senior Fire Officer 2 Wendell Villanueva niawhag sa katawhan nga torotot, takub sa kaldero ug sinsilyo nga ibutang sa lata ug uban pang alternatibong pamaagi ang gamiton sa pagsaba-saba.

Ang pagsaba-saba buhaton sa mga tawo sa pagsugat sa bag-ong tuig sa pagtuo nga kini makawala sa daotang elemento ug demalas.

Gipadayag ni Villanueva nga ang kabomberohan sa Siyudad sa Sugbo ubos karon sa red alert ug andam kanunay sa pagresponde kon kinahanglanon.

Nunot niini, ang pangulo sa Department of Veterinary Medicine and Fisheries Dr. Alice Utlang nihangyo nga mogamit lang og turotot sa pagsugat sa bag-ong tuig aron nga dili makugang ang mga binuhi nga mga iro ug iring sa panimalay. Kasagaran sa mga binuhing mga iro ug iring magkasalimoang matag higayon nga adunay madunggan nga paka o buto sa palibot.

Ang maong pahinumdum dili lang kini alang sa adunay gipanag-iya nga mga iro ug iring sa balay. Sa laing bahin, gidili usab sa Dakbayan sa Sugbo ang paggamit og mga pabuto duol  sa residential area diin adunay designated area kong diin mamahimo nga makapabuto ug pagpahigayon og fireworks display aron masiguro ang seguridad sa katawhan sa pagsaulog sa bag-ong tuig.

Ang mga manindahay og mga pabuto diha sa South Road Property naglaom nga dagsaon sila karong adlawa sa mga mamalitay og pabuto. — Preciosa L. Bacalso, Rowena D. Capistrano (BANAT NEWS)