Tanang brgy. sa Liloan moapil sa Rosquillos Festival

CEBU, Philippines - Katorse ka mga barangay sa lungsod sa Liloan ang mipahibawo nga moapil sa himuong Rosquillos Festival sa lungsod sunod semana.

Si Mayor Vincent Franco “Duke” Frasco miingon nga nalipay siya gumikan kay una kining higayon nga ang 14 ka mga barangay sa lungsod sa Liloan mipakita sa ilang kadasig sa pag-apil sa festival.

Ang katorse ka barangay naglakip sa Cabadiangan, Calero, Catarman, Cotcot, Jubay, Lataban, Mulao, Poblacion, San Roque, San Vicente, Santa Cruz, Tabla, Tayud ug Yati.

Samtang gipahibawo ni kanhi bise mayor Thelma Jordan nga maoy gitahasan ni Mayor Frasco sa pagpangandam sa festival nga ang street dancing ug showdown sa Rosquillos Festival sa hapon sa Mayo 28, 2012 himuon.

Samtang sa pagka Mayo 29, 2012 sa gabii himuon usab ang pagkorona sa mapiling Festival Queen.

Matud pa ni Jordan nga una kining higayon nga nahitabo sa lungsod sa Liloan ilabi na ang pagpahigayon sa festival nga giapilan sa tanang barangay.

Matag tuig nga Rosquillos Festival gisaksihan sa liboan mga molupyo sa lungsod ingon man gikan sa laing mga dapit.

Si Gobernador Gwendolyn Garcia nga mosaksi gyud sa kalihukan matag tuig usa man sa mipadayag sa iyang pagdayeg sa kalampusan ug dakong kalambuan sa mga miapil niini.

Ang kagamhanan sa lungsod mihatag og ayuda nga P100 mil sa matag barangay aron duna sila’y magamit sa pag-apil.

Adunay ganting cash ug tropeyo nga madawat ang nag-unang lima ka mga mananaog nga barangay.

Pinaagi sa Rosquillos ang lungsod sa Liloan nahimong inila nga mao usab ang gibasihan sa ilang festival.

Ang konseho sa lungsod sa Liloan mipalabang og ordinansa nga nag-ila niini nga opisyal nga festival sa lungsod. (BANAT NEWS)