Panagribal sa gang gisusi sa kamatayon sa 20-anyos

CEBU, Philippines - Patay ang 20-anyos nga ulitawo nga gituohang sakop og gang dihang gipusil sa duha ka mga lalaking nagsakay og motorsiklo samtang kini nakigtabi sa kaubang gang member diha sa sitio Balibali sa barangay Cogon lungsod sa Compostela niadtong Sabado sa 9:10 sa gabii.

Ang biktima mao si Michael Castro, 20, nagpuyo sa maong lugar ug gituohang sakop sa Crips gang dihang kalit nga gihunongan sa duha ka batan-ong sakay og itom nga motorsiklo ug namusil.

Matud ni PO3 Ronald Luna, imbestigador sa Compostela Police Station ang biktima nagsakay usab og motorsiklo nianang tungora ug mihunong ug nakigtabi sa kaubang si Jovanni Rosal daplin sa karsada.

Dihang molamano na unta kini aron mobiya kalit miabot ang mga gikatahapan ug mipusil sa biktima tulo ka higayon hinungdan sa pagkaigo ni Castro sa tiyan samtang daling nakatago si Rosal.

Si Rosal mao nay mitabang sa biktima pagdala ngadto sa tambalanan apan patay na kini.

Matud sa kapolisan nagsuot og ski mask ang mga gikatahapan ug nagsuot og jacket nga itom. Nakuha usab sa crime scene ang duha ka basiyo sa kalibre .45 nga bala. - Darrel A. Carumba/EIM (BANAT NEWS)