Pagtambong ni Rama sa KBP party gisaway

CEBU, Philippines - Wala mahimuot ang tsirman sa Kapisanan ng Brodkaster ng Pilipinas-Cebu Chapter nga si Atty. Ruphil Bañoc sa pagtunga ni Mayor Michael Rama sa bag-ohay lang nga party sa maong organisasyon sa miaging gabii.

Sumala pa ni Bañoc pinaagi sa iyang programa sa DYHP nga wala sa iyang kasayoran nga motambong si Rama sa maong party sanglit wala man siya mangimbitar og politiko.

Gihulagway usab ni Bañoc nga usa ka matang sa suborno ang gibuhat ni Rama diin nagpa-raffle kini og cash ngadto sa mga mitambong sa party.

Si Rama nagpa- raffle og walo ka tag P500 busa moabot ngadto sa P4,000 ang nahatag sa mayor.

Apan depensa pa ni Rama nga giimbitar siya sa iyang public information officer nga si Carlo Dugaduga kinsa kanhi chairman usab sa KBP.

Matud pa niya nga gi-text-san siya sa maong kalihukan maong nitungha siya sanglit iya man nga mga higala ang mga sakop sa media.

Matud pa ni Rama nga walay malisya alang kaniya ang pagpa-raffle ug iyang giklaro nga nananghid siya niini.

“Nananghid man ko kung puwede ba mohatag ko sa raffle,” matud pa sa mayor atol sa usa ka interbyu sa mga sakop sa media sa pagsaulog sa anibersaryo sa Cebu City Medical Center kagahapon.

Gani gisaysay sa mayor nga walay kaso kaniya nga atakehon siya og nagkadaiyang isyu sanglit trabaho man kini sa media.

Samtang si Dugaduga dihang gikuhaan unta sa mga tigbalita og pamahayag nagdumili paghatag og pamahayag gumikan kay mag-estorya pa sila ni Bañoc kalabot sa maong isyu. (BANATNEWS)