Tig-asal og manok gikulata, gidakdakan sa mga rugby boys

CEBU, Philippines - Kritikal ang kahimtang sa usa ka tig-asal og manok sa dihang gitabangan kini og kulata ug gidakdakan og bato sa mga rugby boys alas 3 sa miaging kaadlawon sa dalan Lopez Jaena, barangay Poblacion, dakbayan sa Lapulapu.

Si Helvin Bayon-on, 22, lumad nga taga Bantayan island ug stay-in worker sa Siong Shon Chicken House sa barangay Poblacion nagpabilin karon sa Vicente Sotto Memorial Medical Center tungod sa mga samad nga naangkon.

Nadakpan sa kapolisan sila si Jose Sacristan, 18, taga sitio Langob, barangay Poblacion kinsa kuyog sa duha ka minor de edad nga nakadagan ug padayong gipangita sa kapolisan.

Si PO1 Kim Lariosa sa Homicide Section sa kapolisan sa dakbayan nga nahinabi sa Banat News miingon nga si Sacristan nadakpan ni SPO3 Rex Ibañez ug SPO2 Rolito Jumao-as atol sa follow up operation.

Matud ni PO1 Lariosa nga sa imbestigasyon nila ni SPO3 Ibañez, nasuta nga high sa paghingos og rugby si Sacristan ug duha niini ka batang kaubang rugby boy sa dihang nanghagis sila atubangan sa inasalan og manok.

Si Bayon-on nga migawas sa gitrabahoan paingon unta sa usa ka internet café sa maong lugar gisunod ni Sacristan ug sa duha ka kauban ug gikulata.

Ang nakasaksi nga kaubang trabahante sa biktima nga si Jomar Diola, 27, miasoy sa kapolisan nga sa dihang natumba na ang biktima, gidakdakan kini og bato sa iyang ulo.

Si Sacristan nabalhog sa bilanggoan ug gipangita pa ang duha ka kauban niining minor de edad.  – BANAT NEWS