15 ka tawo ang biktima sa 'kuot' atol sa Sugat

CEBU, Philippines - Kinse ka mga tawo ang nabiktima sa pagpanguot atol sa pagsaulog sa Kabanhawan Sugat Festival sa lungsod sa Minglanilla nga gipahigayon diha sa hawanan sa sports complex sa barangay Poblacion kagahapon sa kaadlawon, samtang usa ka batan-on ang napusilan.

Apan duha lang sa kinse ang mireklamong nawagtangan og butang ang pormal nga mireklamo sa kapolisan ug giilang sila si Merly Adolfo, 45-anyos, taga sitio Mananga, barangay Lawaan III, dakbayan sa Talisay ug Emilyn Pelaez, 19, taga barangay Cogon, Pardo, dakbayan sa Sugbo.

Si Adolfo ang nawagtangan sa iyang Olympus digital camera nga nagkantidad og P23,000 samtang si Pelaez, ang nawagtangan sa iyang Motorola nga cellphone nga nagkantidad og P20 mil.

Samtang usa ka gidudahang mangunguot ang nadakpan ug giilang si Dante Cabañero, 30, taga sitio Mananga, dakbayan sa Talisay ug nakuhaan og duha ka Nokia 3310 cellphones ug usa ka Nokia 2300.

Ang nahisgutang mga cellphone ang naa pa sa kustodiya sa kapolisan tungod kay wala pay mi-claim nga tag-iya niini.

Samtang usa ka Jaymar Salunoy, 15-anyos, taga barangay Tungkil sa maong lungsod ang nalandig sa tambalanan human pusila diha sa likod sa wala mailhing tawo kagahapon sa buntag.

Si Salunoy daling gidala sa iyang mga higala ug sa usa ka concerned citizen ngadto sa Minglanilla District Hospital ug gibalhin ngadto sa Vicente Sotto Memorial Medical Center.

Ang mga batan-on gikan pa mitan-aw sa ‘Sugat’ diha sa Poblacion ug nagsakay na sila og traysikol paingon na nga mopauli apan kalit lang nga may tawong mipusil kaniya, ang maong tawo dali sab nga nakaikyas. – BANAT NEWS