Caminero di motuo nga Argao kuwang og income

CEBU - Kuwang sa pagtuo si board member Wilfredo Caminero nga wala makab-ot sa lungsod sa Argao ang tukmang tinuig nga kinitaan niini aron nga inay magpabilin sa pagka-second class municipality nga kategoriya, misukarap na hinuon paubos ngadto sa pagka-third class.

Ang Argao sa miaging tuig, giklasipikar nga second class municipality apan miunlod kini ngadto sa pagka-third class tungod kay wala na makaabot ang iyang annual income sa bracket o sukdanan nga P45 milyones pataas ug dili molapas sa P55 milyones nga kinitaan matag tuig aron magpabilin sa klasipikasyon isip second class nga lungsod.

Si Caminero kinsa kanhi Mayor sa Argao may katahap nga may mga butang nga wala ma-reconcile sa Bureau of Local Government Finance (BLGF) sa Department of Budget and Management nga maoy rason sa pagka down grade sa klasipikasyon sa maong lungsod.

Gitataw ni Caminero sa dihang siya pa ang namunoan sa lungsod sa Argao nga aduna kini annual budget nga 60 milyones ug gani kung buot huna-hunaon sobra kaayo sa gilatid sa balaod nga P55 milyones nga annual income alang sa usa ka lungsod nga maklasipikar nga first class municipality.

Bisan paman niini nagkanayon si Caminero dili gihapon maapektohan ang pagpasabwag sa mga serbisyo ngadto sa katawhan ingon man ang Internal Revenue Allotment (IRA) sa Argao.

Hinuon matud pa niya nga ang apiktuhan niini mao ang mga empleyado sa munisipyo sanglit maglisod na sila sa pag-usbaw sa suholan tungod kay gibase man kini sa status sa usa ka lungsod. – BANAT NEWS