“Notorious” nga tulisan ug  mangunguot nangadakpan

Lain na usab ang nadakpan sulod lang sa pipila ka adlaw sa kapolisan nga gipasanginlang notadong mangunguot dinhi sa Metro Cebu ug dakbayan sa Sugbu.

Niadtong miaging adlaw ug kagahapon sa kaadlawan ang Theft and Robbery Section (TRS) sa Cebu City Police Office nga gipangulohan ni Sr. Insp. Michael Anthony Bastes nakadakop og tulo ka gipasanginlang notadong mangunguot sa managlahing lugar dinhi sa dakbayan sa Sugbu.

Sila si Patrick  Aranas, lumad nga taga Parang Cotabato ug Julius Apostol, residente sa barangay Pasil ug temporaryong  nag-abang og lawak diha sa Forest Hills Banawa barangay Guadalupe ug Redentor Lambo nga taga Lorega gipresentar sa mga sakop sa media ni CCPO Director Sr. Supt Patrocinio Comendador.

Pagka alas 4 nadakpan na gyud sa grupo nilang Sr. Insp Bastes diha sa Forest Hills Banawa Guadalupe si Apostol ug Aranas..

Usa ka kolor itom Kia YAU-175 nga gipanag-iya ni Aranas ang giapil sa pagkumpiskar nilang Bastes.

Sa dihang giablihan kagahapon sa buntag ang awto ni Aranas nga gipasaksihan sa pipila ka sakop sa media nakumpiskar ang nagkalain-laing bag sulod sa awto.

Sobra sa 50 kapin nga dagko ug gagmay nga pitaka, 20 ka resibo sa ahensya nga gituohang maoy giprindahanan sa mga alahas nilang Apostol ug Aranas, onse ka simpak sa cellphone ug onse usab ka nubain.

Giangkon hinuon ni Aranas ang tanan nilang operasyon anha gyud sa mga mall ug dili sila mangungot nga manakay og PUJ.

Giawhag ni Comendador ang mga nabiktima sa pagpanguot nga susihon sa ilang buhatan aron ilhon ang duha ka suspek aron madugangan ang kaso nga ilang ipasaka niini.

Samtang sa laing bahin si Lambo nasikop niadtong Domingo diha sa dalan Imus Road barangay Carreta human makapanglabni og cellphone sa usa ka babaye apan walay suwerte kay nadakpan siya.

Kini maoy ikaduhang higayon nga si Lambo nadakpan sa kapolisan sa susama gihapong salaod.