Mga 'mapahimudsanon' nangapil og dawat sa hinabang sa nasunogan

Higpit nga gibantayan sa mga sakop sa city social welfare and development (DSWD) ang mga lumolupyo sa barangay Mantuyong ug barangay Guizo sa dakbayan sa Mandaue alang sa pagsiguro nga ang mahatagan og hinabang mga tinuod nga mga biktima sa sunog.

Natigayon kini human nila masuta nga pipila sa moapil sa paglinya pagdawat sa giapod-apod nga pagkaon dili mga biktima sa sunog ug mga lumolupyo gikan sa laing lugar.

Si Mayor Thadeo Ouano nga nakadawat sa maong kasayuran ang miawhag sa mga biktima.

Si Candida Comaingking nga maoy pangulo sa city social welfare sa Mandaue ang padayon karon nga naghashas sa ilang mga lista sa mga pangalan sa mga lumolupyo sa Guizo ug Mantuyong nga tinuod gayod nga mga biktima.

Ang media liaison ni Mayor Ouano nga si Nerito Martinez nga gikahinabi sa Banat News miingon nga ang mga biktima sa sunog ang ilang hatagan og pagkaon nga gikan sa Jollibee.

Matud pa niya nga molungtad og lima ka adlaw ang paghatag og pagkaon sa mga biktima nga naglakip sa pamahaw, paniudto ug panihapon.

Si Noime Rafols sa barangay Mantuyong nga usa sa mga biktima sa sunog nga gikahinabi sa Banat News ang hugtanon usab nga mihimakak nga nagkulang ang ilang pagkaon sa evacuation center.

Giklaro niya nga nanobra ang pagkaon nga gihatag kanila sanglit gawas sa kagamhanan sa maong dakbayan may pipila usab ka pundok sa katilingban ang mihatag niini ngadto kanila.