Koronasyon sa Sogod nahimong dugoon; 1 patay, 1 kritikal

Usa ang namatay ug usa kritikal ang kahimtang sa minor de edad human sa nahitabong pagpamusil sa duha sa upat ka mga batan-on atol sa disko ug coronation night atol sa pista nga gipahigayon didto sa Sitio Tamayon, Cabangahan, Sogod, Cebu niadtong Domingo pasado alas 2 ang takna sa kaadlawon.

Patay nang nahidangat sa Juan Dosado Memorial Hospital ang biktimang giila sa kapolisan nga si Antonio Pontemayor Sr. mag-uuma ug kritikal ang kahimtang sulod sa Vicente Sotto Memorial Medical Center si John Caparoso, 16, pulos residente sa samang dapit.

Ang gitumbok nga suspek sa pagpamusil mao si Sonny Catapatan, 19, ulitawo ug Joseph Monrecillo, 19, ulitawo nga taga Sitio Caloboan, Calabawan sa maong lungsod samtang ang duha niini ka kauban nailhan nga si Noel Baga, 18, ulitawo ug Norman Montecillo, 19, pulos nagpuyo sa nahisgutang lugar.

Si Pontemayor naigo sa bala sa wala pa matinong kalibre sa armas diha sa kuto-kuto nga maoy nakaingon sa kamatayon niini samtang si Caparoso diha sa liog.

Segun sa report sa kapolisan nga midangat sa Cebu Provincial Police Office nasayran ang mga biktima ug ang mga suspek mitambong og koronasyon sa maong dapit.

Ang usa sa upat ka suspek kalit lang nakakita og lalis sulod sa diskohan nga ig-agaw sa namatay nga si Kim Pontemayor sa wala pa matinong hinungdan.

Ang maong mga batan-on nanggawas sa diskohan apan sa dihang diha na sila duol sa mga biktima mibunot sa ilang armas diha sa hawak si Catapatan ug Joseph.

Dihadiha nagpabuto sa ilang armas ang duha tumong ngadto sa mga biktima hinungdan nga nangaigo ang duha.

Human sa hitabo ang upat ka suspetsado daling nanagan palayo sa lugar ngadto na sa ilang pagsibat.

Ang duha ka biktima daling gihatod sa Juan Dosado Memorial Hospital apan si Pontemayor maoy nakabsan sa kinabuhi samtang si Caparoso gibalhin sa DVSMMC.

"Gitagalan na lang sa doktor og duha ka adlaw (Caparoso) kay naliog man pagkaigo sa bala maayo lang og mabuhi kay makuhaan namo og pamahayag ang biktima," asoy ni SPO1 William Jumao-as dihang nahinabi sa Banat News.

Matud ni SPO1 Jumao-as duna na silay duha ka witness nga anaa karon kanila gikustodiya batok sa upat ka mga suspetsado.

Sa pagkakaron ang kapolisan nagpadayon pa sa ilang pagpangita sa gikatahapan human gikatahong nanglayas na palayo sa lugar.