Food vendors sa Belgium miduol kang Bimbo, Jojo

Nagpanon nga nakigtagbo ngadto kang City Administrator Francisco Fernandez ug acting market administrator Elpidio dela Victoria Jr. ang mga manindahay og pagkaon sa may Belgium street phase-1 sa Pasil Fish Market.

Mihangyo ang maong grupo sa mga manindahay og pagkaon sa daplin sa dalan sa maong lugar nga dili ihinayon ang planong pagpa-demolis sa ilang mga paninda gumikan kay mao kini ilang gisaligan sa adlaw adlaw nilang panginahanglan.

Ang Pasil, Suba, Sawang Calero Vendors Association nagpauban kini ni Cristopher Ong ang operations officer sa Revenue Monitoring Task force nga mipaabot sa ilang hangyu sa City Hall.

Hinuon nasabutan sa mao nilang tigum ngadto kang dela Victoria kagahapon sa buntag nga adto nalang mohangyo ang maong mga vendors kang Konsehal Procopio Fernandez nga maoy giingong mireklamo sa presensya sa maong mga vendors nga nakasamok sa dalan.

Apan giklaro ni Fernandez nga wala siya morekomendar nga ipa-demolis ang maong mga vendors kun dili gusto lang niya nga mabalhin kini ngadto sa hustong lugar ilabi na kay nakumpleto na ang pagsemento ang maong dalan.

Gipasabot sa konsehal nga temporaryo lang ang pagpahiluna sa maong mga vendors kaniadto diha sa maong dapit samtang giayo pa ang maong agianan apan karon nga nakumpleto na kini tinguha niya nga mapa-angayan gyud og hustong lugar ang maong mga vendors aron dili makasamok sa maong dalan.

Usa sa giplanohan karon nga balhinan sa maong mga vendors mao ang bakanting dapit taliwala sa may Phase-I og Phase-2 sa Pasil Fish Market.