Drayber sa patrol car nga nakaligis og babaye gikiha

Gipasakaan og kasong reckless imprudence resulting to homicide ang drayber sa mobile patrol car 06 sa kapolisan sa dakbayan sa Mandaue nga nakaligis og babaye atol sa pagtubag og alarma.

Si PO3 Eleazar Saromines, imbestigador sa traffic section sa Mandaue City Police Office (MCPO) nga gikahinabi sa Banat News miingon nga si Brian Manatad, 26 anyos, ulitawo nga taga Labogon nga maoy nagmaneho sa mobile 06 nga Nissan Terrano nga nagdala sa plate number GTL 944 maoy gipasakaan og kaso.

Matud pa ni PO3 Saromines nga kusog nga nagdagan ang sakyanan nga gimaneho ni Manatad.

Sa paghidangat gayod niini sa dalan M.C. Briones ang biktima nga si Gloria Ty Manluluyo, 57 anyos, minyo nga taga Maria Teresa Village sa dakbayan sa Sugbo kalit lang nga nadasmagan nga maoy hinungdan sa grabe niining pagkaangol.

Matud pa ni PO3 Saromines nga ang maong sakyanan maoy giluwanan nila PO3 Reynerio Patillos, PO1 Santiago Anticristo nga nagtubag sa alarma sa barangay Cabancalan.

Si PO2 Godstone Reconalia, operator sa MCPO maoy nakadawat sa maong alarma nga gitawag sa telepono sa guwardiya sa Cebu Legacy Corporation sa Pilit, Cabancalan.

Ang gialarma sa guwardiya mao ang wala hiilhing tawo nga katahapan ang lihok nga misulod sa compound sa nahisgotang establisamento.

Matud pa ni Reconalia nga ang kapolisan sa Presinto 4 sa Casuntingan maoy mihimo og pakisusi sa maong alarma sanglit ang patrol car nga gisakyan sa mga polis nga mitubag niini ang nakasugat man og aksidente.

Samtang si Saromines miingon nga midagan sa paglabang sa pikas dalan ang biktima ug nadasmagan kini sa paghidangat sa tunga sa karsada.

Dugang pa niya nga dali unta nga gidala ang biktima sa Mandaue City Hospital apan nakabsan gayod kini sa gininhawa.