Manager, todas sa sekyu ng subdibisyon!

Sinita sa dalang construction materials

CAVITE, Philippines — Brutal ang sinapit na kamatayan ng isang manager matapos barilin ng dalawang beses sa ulo ng officer-in-charge ng isang security agency at security guard na rin ng kanilang subdivision matapos sitahin sa mga dala nitong cons­truction materials, kamakalawa sa Villa Felicia, Brgy. Baya­nan, Bacoor City, Cavite.

Dead-on-the-spot ang biktima mula sa 2 ba­lang bumaon sa ulo nito na kinilalang si alyas Ri­chard, residente ng Blk. 16 Lot 22 Kosmos St. Villa Felicia Subdivision, Brgy. Bayanan, Bacoor City. 

Tumakas naman ang suspek matapos ang pamamaril na kinilalang si alyas Rudy, 53-anyos, OIC/security Guard ng Star Matrix Security Agency na nakatalaga sa gate ng Villa Felicia Subdivision, at residente ng Brgy. Molino 2, Bacoor City, Cavite.

Sa imbestigasyon ng pulisya, alas-9:10 ng umaga nang maganap ang insidente, papasok na sana sa kanilang subdivision ang biktima sakay ng kotse nito na puting Mazda 323 Sedan na may plakang UMA 374 nang harangin at sitahin ng nasabing nakatalagang security guard sa gate hinggil sa mga dala nitong construction materials.

Nagkasagutan ang dalawa hanggang sa mauwi sa pagtatalo at mapikon ang suspek. Dito na binaril ng dalawang beses sa ulo ng guardya ang biktima ng naisyung baril nito na 9mm bago mabilis na tumakas.

Kasalukuyan nang tinutugis ng pulisya ang suspek.