Hiyasmin (220)
“Hindi ko alam na ganyan pala ang nangyari kina Hiyasmin at Dax, Mareng Julia. Hindi ikinukuwento sa akin ni Hiyasmin na nakiusap pala siya kay Dax para maging kasambahay,’’ sabi ni Mama Lira na nagtataka ang boses.
“Ganyan nga ang nangyari, Mareng Lira. Pero hindi pumayag si Dax na gawin siyang kasambahay at sa halip ginawang scholar si Hiyasmin. Makaraan iyon, muling nagmakaawa si Hiyasmin na patirahin na sa bahay. Ayon kay Hiyasmin, natatakot siya sa kanyang stepfather na maaaring gahasain siya. Pagkukuwento ni Hiyasmin, lagi raw siyang sinisilipan ng kanyang stepfather at baka raw dumating ang oras na pasukin siya nito sa banyo at reypin.
“Napakiusapan daw niyang muli si Dax kaya masayang-masaya siya. Sa wakas daw, matatakasan na niya ang ginagawang paninilip ng manyakis na stepfather,” tumigil sa pagsasalita si Nanay Julia nang mapansin na bumuntunghininga si Mama Lira at nag-isip.
“Bakit Mare?’’ tanong ni Nanay Julia.
“Ha? A e naisip ko lang Mare ang mga kawalanghiyaang ginawa ng demonyo kay Hiyasmin. Totoo yun na talagang sinisilipan ng demonyo si Hiyasmin. Nagsumbong sa akin si Hiyasmin sa ginagawa ng demonyo pero wala akong magawa. Takot ako sa demonyo. Wala akong nagawang tulong kay Hiyasmin. Kaya nang magpasya si Hiyasmin na hindi na titira sa bahay, hindi na ako tumutol. Wala naman akong magawa para siya protektahan. Naging sunud-sunuran ako sa gusto ng demonyo!”
Samantala, habang nagkukuwentuhan sina Mama Lira at Nanay Julia, napansin sila nina Hiyasmin at Dax.
“Sarap na sarap sila sa pagkukuwentuhan, Hiyasmin. Ano kaya ang pinagkukuwentuhan nila?”
“Nagkukumpisal siguro si Mama.”
(Itutuloy)
- Latest
