Granada ikinabit sa manibela, pulis nasabugan

AMADEO, Cavite – Grabe ang kalagayan sa pagamutan ng isang pulis matapos masabugan ng granada na ikinabit sa manibela ng kanyang kotse kahapon ng umaga sa Brgy. Halang ng bayang ito.

Ang biktima na nagtamo ng mga sugat sa ibat ibang bahagi ng katawan ay nakilalang si SPO1 Edgar Leachon, 42, na nakadestino sa Mobile Patrol Group.

Sa pagsisiyasat ni PO3 Zaldy Salazar, dakong alas-7:30 ng umaga ay nililinis ng biktima ang kanyang Mitsubishi Gallant (NJC-445) nang mapansin nito ang isang plastic na nakatali sa kanyang manibela.

Agad niya itong tinanggal sa pagkakatali, subalit agad itong sumambulat.

Ang biktima ay dinala sa Gateway Business Hospital habang inaalam pa ng pulisya kung sino ang suspek na nagtanim ng granada sa kotse. (Ulat ni Cristina G. Timbang)