P-noy: Hindi na ako tatakbo sa 2016

TIAONG, Quezon, Philippines - Hiniling ni Pangulong Noynoy Aquino sa kanyang mga kalaban sa pulitika na huwag na siyang gibain dahil hindi na siya tatakbo sa darating na 2016 elections.

Ito ang mensahe ng Pangulong Aquino sa ground breaking ceremony ng Toll Road 4 ng Southern Luzon Expressway kahapon at pinabulaanan ang  kumalat na  tsismis na hinimatay siya at nabagok pa ang ulo.habang may kausap sa Malacañang. “Ang tindi talaga nitong mga kalaban natin. Bakit hanggang diyan umabot na sila? At siguro matanong ko rin sa sarili ko: At alam naman po nilang hindi na ako tatakbo next year, bakit ba pinupuntirya na nila parati akong banatan,  at banatan? Simple lang po ang sagot diyan. Kung ako po’y maganda ang nagawa at kinikilala siguro ng ating mga kritiko, natural ‘pag tayo’y nag-endorso, may halaga. So ang trabaho po nila ngayon, lahat ng napagtulungan natin ay gawing balewala para sa ganoong paraan ‘pag na­ngako silang mas mabuti ang gagawin nila, tila mas madali,” paliwanag pa ni Aquino kahapon.