Hall Of Fame Award sa nutrional program nasungkit: Malnutrisyon sa Taguig, bumaba

MANILA, Philippines – Matapos na magkamit ng iba’t ibang  citation sa pagpapatupad ng mga nutrional programs, ginawaran ang Pamahalaang Lungsod ng Taguig ng ‘Pabasa sa Nutrisyon Hall of Fame Award ‘para sa taong 2015  ng Philippine Association of Nutrition (PAN).

Ayon  sa mga  opisyal ng PAN, ang hall of fame award ay pagkilala sa  nagawa ng  go­vernment at non-government organizations sa  lipunan sa mga nagdaang taon.

Kasabay nito, kinilala din ang galing ng pa­ma­halaang lungsod ng Taguig matapos na maibaba sa 1 porsiyento ang malnutrisyon sa loob ng  halos isang taon.

Matatandaang  iginawad ng National Nutrition Council-National Capital Region (NNC-NCR), noong 2014 Regional Nutrition Awarding Ceremony noong nakaraang taon  ang Green Banner Award matapos na maitala ang 0.88 percent para sa 2014 kumpara sa 1.38 percent  noong nakaraang  taon sa kaso ng malnutrition. Ang Green Banner award ang  pinakamataas na pagkilala sa LGU hinggil sa pagpapatupad at pamamahalang nutrition programs.

“We are again proud of this award. It is not everyday that we do get to honor our people for the exemplary job that they do for their fellow Taguigenos,” ani Mayor Lani Cayetano.

Ang nasabing parangal ay indikasyon lamang  na natupad ng  pamahalaang lungsod ang kanilang responsibilidad na  labanan ang malnutrisyon lalu na sa mga ina at  bata.