Trader itinumba sa harap ng ka-live-in

MANILA, Philippines - Patay ang isang negosyante makaraang pasukin ito sa loob ng kanyang warehouse ng dalawang hindi nakikilalang suspect at pagbabarilin sa harap ng kanyang live-in partner sa lungsod Quezon, kamakalawa. Si Jonathan Laureal, 43, ng Brgy. Commonwealth ay agad na binawian ng buhay dulot ng mga tama ng bala sa kanyang katawan, ayon kay PO2 Marlon dela Vega, may-hawak ng kaso. Agad namang nagsitakas ang dalawang salarin sakay ng isang motorsiklo na walang plaka.

Nangyari ang insidente sa  loob ng isang warehouse na matatagpuan sa bahay ng biktima, partikular sa Doña Nicasia Subd., Motorola St., Brgy. Commonwealth, ganap na alas -7 ng gabi. Diumano, nasa loob ng kanilang warehouse ang biktima kasama ang live in partner na si Tripinia Abalang at busy sa pag-aayos ng kanilang kalakal na plastic nang pumasok ang isa sa mga  suspek at biglang pinagbabaril ang una.

Matapos ang pamamaril, agad na umalis sa lugar ang suspek at nagtungo sa kasamahan niyang naghihintay sa motorsiklo at nagsilbing lookout saka nagsipagtakas.