Ginang dinakip sa pagbebenta ng sex online live show ng mga anak na minor

MANILA, Philippines — Isang ginang ang dinakip ng mga tauhan ng National Bureau of Investigation (NBI) sa Taguig City sa pagbebenta sa online ng mga live sex show ng mga bata kabilang ang kanyang mga anak na babae.

Ang ginang ay naaresto noong Oktubre 21 ng mga operatiba ng Human Trafficking Division (NBI-HTRAD) na nagsilbi ng Warrant to Search and Examine Computer Data (WSSECD) na ­inisyu ng Taguig City Regional Trial Court (RTC) Branch 15.

Kinumpiska rin ang computer devices, ilang sex toys at money remittances ng ginang.

Sinabi ng NBI na isinagawa ang operasyon base sa impormasyon natanggap ng NBI-HTRAD na ang umano’y facilitator sa Pilipinas ay nagpapadala ng malalaswang larawan at videos ng mga menor-de-edad sa United States.

Nalaman ng NBI-HTRAD na ang ginang ay patuloy na nag-aalok ng live shows ng kanyang dalawang anak na babae na menor-de-edad kapalit ng pera.

Itinuloy ng NBI-HTRAD ang operasyon matapos ipaalam ng babae sa isang undercover agent na gaganapin ang live show sa araw kung saan siya naaresto.