Vitor, asilo nagmadaogon sa ilang pagbalik sa ring

CEBU, Philippines — Sila si John Virgel “Valiente” Vitor and Gerwin “Gladiator” Asilo sa PMI Bohol Boxing Stable impresibong namawi gikan sa miagi nilang kapildihan atol sa “Kumong Bol-Anon 20” fight card niadtong Marso 9 didto sa isla sa Panglao sa Bohol.

Ang 27-anyos nga si Vitor nanginahanglan lamang og 62 puntos aron patikangkangon si Rey Ramos sa Fitness Barracks Pampanga.

Gawas nga miinat sa iyang rekord ngadto sa 23-4 nga gidayan-dayanan na karon og 16KOs, si Vitor tataw nga nabalikan sab sa iyang kadasig human malangkati sa iyang bakus isip World Boxing Organization (WBO) Oriental super featherweight champion ni Yeerjalahasi Laayibieke sa China niadtong Hulyo 24 sa miaging tuig didto sa Bohol Wisdom School (BWS) gym sa Tagbilaran City.

Sama ni Vitor, ang 24-anyos nga si Asilo mibalik sab nga madaogon human gibuntog si Jeny Boy Boca pinaagi sa unanimous decision.

Ang tulo ka mga judges parehong mi-iskor og 59-55 alang ni Asilo, nga nagkupot na karon og 10-1 nga baraha uban ang 4KOs. Iyang natilawan ang bugtong niyang pilde pinaagi sa unanimous decision sa mga kamot sa Hapon nga si Tenshin Nasukawa sa ilang World Boxing Organization (WBO) Asia Pacific bantamweight championship bout lima ka bulan na ang milabay didto sa Ariake Arena sa Tokyo,      Japan.

Sa ubang mga resulta sa kulbahinam nga pasundayag nga gipasiugdahan sa PMI Bohol Boxing Promotions nga gipangulohan sa CEO nilang si Atty. Floriezyl Echavez Podot, si Leonard Pores III mi-TKO ni Dennis Gaviola sa ikalimang hugna aron inaton ang mainit niyang ratsada ngadto sa 6-0 uban ang 5KOs, samtang sila si Datu Adam ug Freshler Utrera parehong midaog pinaagi sa unanimous decision batok nilang Rex Bautista ug Jethro Lusorio.